Rusiye işğalcileri Qara deñizde "Kalibr" qanatlı raketalarını taşığan gemisini arbiy hızmetke yolladılar. Onıñ umumiy ateş quveti dört raketağa qadar. Bu, esas noqtanı qorçalamaq ya da akvatoriyanı nezaret etmek vazifelerini eda etken suvastı gemisidir. Amma bir kün evelsi Rusiye 48 raketanen ateş aça bilecek 16 gemisini arbiy hızmetke yolladı.
Arbiy deñiz quvetleriniñ nutuqçısı Dmıtro Pletençuk bunı añlattı.
Onıñ aytqanına köre, Rusiye gemileriniñ esas qısmı Novorosiyskteki baza noqtasınaqayttı.
"Bu vaqianıñ episi aqqında aytsaq, rusiyelilerniñ kütleviy şekilde baza noqtasını terk etmesiniñ sebebi ne olğanını tam olaraq bilmeymiz, çünki olar bütün raketa taşıyıcılarını çıqardılar — yani sekizinden yedisini. Sekizinci gemi, başqa gemiler kibi, tamir etilmekte. Bir de bir malümat, olarnıñ ücüm noqtasını terk etmeleriniñ sebebi oldı, dep tahmin etmek mümkün. Belki de, gemi-kater taqımınıñ diqqatını dağıtmaq maqsadınen", — dep Dmıtro Pletçençuk añlattı.
Aynı zamanda Azaq-Qara deñiz bölgesiniñ vaziyetinde deñişmeler yoq. Lâkin "Kalibr" kibi qanatlı raketalarnıñ qullanuv telükesi bar.
"Novorosiyskteki baza noqtasında ne içün saqlanğanlarını ve adet üzre Qara deñizge çıqmağanlarını unutmamaq kerek. Çünki Qara deñizde olarnı ukrain uçucısız dronları, deñiz arbiy sistemaları telükesi bekley. Qara deñizde olğan telükeler ve sıñırlav faktorları köz ögüne alınsa, operatsiyanı keçirmek maqsadınen çıqqanları pek mümkün degil", — dep arbiy deñiz quvetleriniñ nutuqçısı qoştı.
Hatırlatamız ki, "Magura" deñiz dronına "ava-ava" sınıflı raketalar qoyuldı ve Qara deñizdeki ameliyatlarda qullanıla.
Telegram ve Facebookta Suspilne Qırım haberlerine abune oluñız
