Ukrainada işğalden azat etilecek topraqlar içün Reintegratsiya idare etüv programması içün hadimler yedegini teşkil etmek içün tasil programması çalışa. 94 insan sertifikatını alacaq. Programmada iştirak etkenlerniñ 80%-i — şimdiki işğal etilgen Qırım, Donetsk ve Luhansk vilâyetleriniñ temsilcileri.
MİMniñ Biznes mektebiniñ prezidenti İrına Tıhomırova matbuat konferentsiyası vaqtında şunı ayttı: "Kelecekte işğalden qurtaruv içün hadimler yedegi: Reintegratsiya idare etüv programmasınıñ ilk gruppasınıñ oquvı bitti". Bu, Ukraina Prezidentiniñ Qırım Muhtar Cumhuriyetindeki Temsilciliginen ortaq leyhadır.
Altı ay devamında onlayn programma diñleyicileri qanun bazasını, idare etüv usullarını ve leyha idare etüvini ögene ediler. Ayrı bir fen blokı şimdiki işğal etilgen topraqlar ve olarnıñ şekillenmesiniñ hususiyetlerine tarihiy ekskursiyağa bağışlandı. Umumen namzetler 200-den çoq ariza berdi.
“99 insan kurslarnı bitirdi. Bu aman-aman yüz faiz bir netice. Bu 99 kişiden 94-ü programma yekünlenmesi aqqında şeadetnameler alacaq, beş kişi ise programma iştirak şeadetnamelerini alacaq, demek ki, olar ayrı talaplarnı yerine ketirmediler. Birinciden, mezun leyhalarnıñ qoruvı. Sebepleri farqlı - birisi USQne çağırıldı ve oquvını devam etip olamadı, birisi işniñ hususiyetleri sebebinden", - dep İrına Tıhomırova.
Onıñ aytqanına köre, bu programmanıñ başqalarından farqı şunda ki, onı ayrı mütehassıslarnı degil de, idare taqımlarını azırlay ediler. Soñunda iştirakçiler leyhanıñ mevzusını saylay ediler. Umumen Qırım ve Donbas mevzusınen bağlı 20 leyha bar edi.
Ukraina Prezidentiniñ Qırım Muhtar Cumhuriyetindeki Daimiy Temsilcisiniñ muavini Olha Kurışkonıñ aytqanına köre, programmanıñ iştirakçileri devlet idare etüvi ve memuriyetçilik, em de biznes modelleri şekillendirüvi boyunca beceriklerni aldılar.
“Böyle programmalarnıñ muvafaqiyetli tecribesi bar, bir qaçısı farqlı ortaqlarnen. Bu leyhanıñ hususiyeti — işğal etilgen topraqlarnıñ reintegratsiyası, işğalden azat etmek içün çeşit tecribelerniñ birleşmesidir”, — dep Kurışko ayttı.
Programmanıñ iştirakçisi, Qırımdan kelgen Oleksiy Radçenko, işğalden azat etilecek topraqlarnıñ reintegratsiyası meseleleri bilgilerini almağa istedi.
Onıñ aytqanına köre, onıñ taqımı işğalden evel yarımadada yaşağan qırımlılardan ibaret edi. Olar Qırım Muhtar Cumhuriyeti ve Aqyar şeeri misalinde azat etilecek topraqlarda makeme sistemasınıñ ğayrıdan tiklenüvi mevzusını sayladılar.
“Menim içün bu şahsiy bir çağıruv, işğalden azat etilecek Qırımdaki ukrain cemiyetine qaytmaq içün iştirak etmek kerek”, — dep Oleksiy Radçenko qayd etti.
Olha Kurışkonıñ hatırlatqanına köre, azat etilecek Qırımda çalışmaq içün 50 biñ çeşit saa mütehassısları kerek. Olar devlet memurları, ocalar, tibbiy mütehassıslar ve yerli idare mütehassıslarıdır.
“Ükümetnen işbirlik alıp, uquq ceetinden hadimler yedegini meydanğa ketirecekmiz. Çünki er bir nazirlik hadimler yedegini teşkil etmek içün öz qaideler cedvelini tasdıqlamalı, ve kerçekten de onı teşkil etmeli”, — dep qoştı o.
Olha Kurışko şunı da qayd etti ki, işğalden azat etilecek topraqlarda çalışmaq içün devlet hızmetçileriniñ hadimler yedegi yavaş-yavaş teşkil etile. Bu, Milliy devlet hızmetiniñ hadimler yedeginen müddetsiz bir deñev leyhasıdır.
“Endi baqılğan 2,5 biñ ariza bar, yani insanlar daima bu cedvelde bulunalar”, — dep Ukraina Prezidentiniñ Qırım Muhtar Cumhuriyetindeki Daimiy Temsilcisiniñ muavini ayttı.
Ondan ğayrı, onıñ aytqanına köre, Taras Şevçenko adına Kıyiv milliy universitetinen amelge keçirilgen leyhanıñ bir qısmı bar. Aynı zamanda temsilcilik başqa oquv yurtlarından, şu cümleden V.N. Karazin adına Harkiv milliy universitetinden de muracaatlar ala. Onıñnen beraber işğalden azat etilecek topraqlarda çalışmaq içün mütehassıslarnı azırlav devlet programması azırlana.
Telegram ve Facebookta Suspilne Qırım haberlerine abune oluñız
