Avropa eyyetiniñ prezidenti Ursula fon der Lâyen, Avropa Birligi er vaqıt Ukrainanıñ topraq bütünligine qol tutacaq, şu cümleden Qırım ve Aqyar şeerini ukrain devletiniñ qısmı olaraq tanıyacaq, dep bildirdi.
Berim ayınıñ 11. künü Qırım platformasınıñ dörtünci sammiti vaqtında bu aqqında haber berdi. Siyasetçi, çıqışınıñ videosını öz X saifesinde yayınladı.
"Rusiyeniñ Ukrainağa qarşı tecavuzına 10 yıl oldı. Ukrainliler adalet, demokratiya ve Avropa kelecegini talap eteler. Rusiye yarımadanıñ qanunsız işğalinen cevap berdi. Bu açıq-aydın: Qırım ve Aqyar — Ukrainadır. Avropa Birligi Ukrainanıñ topraq bütünligine qol tutmağa asla yorulmaycaq. Beraber dayanacaqmız ve birleşip yeñecekmiz, çünki biz serbest ve demokratik Ukrainağa sadıqmız", — dep Ursula fon der Lâyen qayd etti.
Qırım platforması — Ukrainanıñ teşebbüsinen Qırım meselesini kün tertibine qaytarmaq, insan aqlarını qorçalamaq, yarımadanıñ işğalden qurtarılmasına yardım etmek, Avropa ve global havfsızlığını pekitmek içün halqara idare mehanizmidir.
Telegram ve Facebookta Suspilne Qırım haberlerine abune oluñız
