Kyivdeki Barışıq meydanında berim ayınıñ 11-nde Qırımtatar halqınıñ genotsid fedaralarınıñ hatırasına memorial açıldı.
Bunı Suspilne Qırım mühbiri bildirdi.
Hatıra abidesi qırımtatar halqınıñ faciasını añmaq içün qurulğan. Ukraina prezidenti Volodımır Zelenskıy açılış merasiminde qayd etti ki, bir kün işğalden azat etilecek Qırımda da böyle bir hatıra peyda olacaq.
"Bu, bizim birlik ve adaletni tiklemek qararımıznıñ timsalidir. Bu pek müim. Ve biz Rusiye işğali Qırımğa kene keder ketirgenini köremiz", — dep qayd etti Ukraina prezidenti Volodımır Zelenskıy memorialnıñ açılış merasiminde.
Qırımtatar halqınıñ lideri Mustafa Cemilev açılış tedbirinde bu üç vaqia Qırım ve hususan tamır halqı içün felâketli neticeler ketirdi, dep bildirdi.
"Birinciden, bu 1783 senesi Qırımnıñ işğali. Neticesinde Qırım hanlığınıñ bütün medeniy degerlikleri yoq etildi ve yağmalandı, kitaphaneler ve arhivler yaqıldı, milliy elita öldürildi, qırımtatarlar kütleviy icretine mecbur etildi ve olar ruslar tarafından yerleştirildi. İşğalniñ bir qaç yılı devamında Qırımnıñ tamır halqı öz vatanında milliy azlıq oldı", — dep bildirdi o.
Aynı zamanda Cemilev şunı da qayd etti ki, 1944 senesiniñ umumiy sürgünliginden soñki eki sene içinde qırımtatar halqınıñ 40%-i elâk oldı.
"Qırımda qırımtatar halqınıñ medeniy mirasınıñ bütün izleri yoq etildi, bütün coğrafik adlar deñiştirildi, qırımtatarlar aqqında hatırlatqan er şey yoq etildi. Bu halqnı bütünley yoq etmek ve onıñ hatırasını silmek maqsadı qoyulğanı açıq-aydın körüne", — dep qırımtatar halqınıñ lideri qayd etti.
Bu abide qırımtatarlar içün bağışlanğan üçünci facialı vaqia – 2014 senesi Rusiye tarafından Qırımnıñ işğali.
"Ve kene basqılar, insanla hırsızlana ve öldürile, biñlernen tintile, apis cezaları, apishanelerde azaplanalar, insanlarnı öz memleketine qarşı cenkleşmege mecbur eteler, öz vatanınıñ tamır halqını sürgün eteler ve kene Qırımda Rusiye vatandaşları kütleviy şekilde yerleştireler. Yani, şimdi Rusiye Federatsiyası degen memlekette reberler, idare etüv sisteması deñişe, amma onıñ pis özü alâ daa saqlanıp qalmaqta", — dep Cemilev qayd etti.
Zelenskıynıñ aytqanına köre, şimdi qırımtatarlar, ukrainler, faalciler Rusiye apishanelerinde aqiqatnı aytqanları ve işğalcilerge boysunmağanları içün oturalar.
"Leniye Umerova, Server Mustafayev, Aziz ve Asan Ahtemov ağa-qardaşları ve daa yüzlernen başqa sürgün etilgenlerniñ soyları şimdi kene taqip etile. İşğalciler 1944 senesi sürgün etilgenlerni yıqıp olamaycaq kibi, bizni de yıqıp olamaycaqlar. Qırım — tek bir topraq degil, o, ruhımıznıñ bir parçasıdır, halqımız öz tili, medeniyeti, ananelerinen barışıq ve aenk içinde yaşağan bir topraqtır. Biz tek Qırımnı qaytarmaq içün degil, adaletni tiklemek içün küreşemiz", — dep qayd etti o.
Qırımtatar halqınıñ genotsid fedalarını añmaq içün abide aqqında ne bilemiz
Mayısnıñ 18-nde Kıyivdeki Barışıq meydanında qırımtatar halqınıñ sürgünliginiñ 80 yıllığında Ukraina prezidenti Volodımır Zelenskıy tarafından teşebbüs etilgen qırımtatar halqınıñ genotsid fedalarınıñ hatırasına kelecek abideniñ temel taşınıñ qoyulması merasimi olıp keçti.
Qırımtatar halqınıñ lideri, halq mebusı, Ukraina Qaramanı Mustafa Cemilev, memorial devletniñ Qırımnıñ tamır halqına munasebetini köstere, dep bildirdi. Hususan şimdi, işğalciler qırımtatarlarnı vatanında faal sürette taqip etken vaqıt.
2016 senesine qadar memorial yerinde çekistlerge bağışlanğan abide tura edi. Öz çıqışında Volodımır Zelenskıy, 80 yıl evelsi olğanı kibi, Rusiye Qırım sakinlerini yoq etmege devam ete, dep qayd etti.
Telegram ve Facebookta Suspilne Qırım haberlerine abune oluñız
