1927 senesi berim ayınıñ 10-12. künleri Birinci Bütünqırım imlâ konferentsiyasınıñ tarihı munasebetinen Ukrainada berim ayınıñ 10. kününi Qırımtatar tili ve edebiyatı künü olaraq qayd etmege teklif etildi. Konferentsiya vaqtında yapılğan islâat qırımtatar tiliniñ inkişafı içün alâ daa müimdir.
Qırımtatar tiliniñ inkişafı institutınıñ Facebook saifesinde bu aqqında haber etildi.
Qırımtatar tili ve edebiyatı kününiñ ilân etilmesi qırımtatar tiliniñ saqlanuvı meselelerine diqqat celp etmek ve qırımtatar halqınıñ kimliginiñ esas elementi olaraq onıñ qıymetini ürmet etmek içün müim aletlerden biridir.
Bunıñ içün Qırımtatar tiliniñ inkişafı institutı Qırımtatar Milliy Meclisi, devlet ve devletten tış institutlar ve belli alimlernen bir qaç mesleat keçirdi. Hususan, vaqtınca işğal etilgen Qırım topraqlarında yaşağanlarnen.
"Berim ayınıñ 10-nda Qırımtatar tili ve edebiyatı kününi qayd etüv qırımtatar tilini saqlap qalmaq ve inkişaf etmek içün ğayret etken ve köstergen er kesniñ muvafaqiyetlerini ürmet etmek, em de - qırımtatar tilini Qırımnıñ tamır halqınıñ tili olaraq Ukrainanıñ cemaat boşluğında populârlaştırmaq ve körsetmek içün bir imkân olacaq, bu ise Ukraina vatandaşlarınıñ til ve medeniy añlayışını arttıracaq ve qırımtatar ve ukrain halqlarınıñ medeniy munasebetlerine yardım etecek", — dep bildirildi.
Aynı zamanda Qırımtatar Milliy Meclisiniñ reisi Refat Çubarov Facebook saifesinde qayd etti ki, qırımtatar halqınıñ mektübi mayısnıñ 30-nda Ukraina Medeniyet ve malümat siyaseti nazirligine yollandı.
"Ukrainada berim ayınıñ 10 kününi Qırımtatar tili ve edebiyatı künü olaraq ilân etmege teklif etile. Bu yönelişte iş devam ete, Ukraina prezidentiniñ buyruğını ya da Ukraina Nazirler Kabinetiniñ qararını bekleymiz", — dep Refat Çubarov qoştı.
Hatırlatamız ki, Google Translatede qırımtatar tili peyda oldı. Ukraina ükümeti 2020 senesi hızmetke qırımtatar tilini kirsetmek teklifinen muracaat etti.
Telegram ve Facebookta Suspilne Qırım haberlerine abune oluñız
