Vaqtınca işğal etilgen Qırımda Ukrainağa açıq şekilde qol tutqan Qırımnıñ sakinlerine qarşı basqı dalğası devam ete. Soñki afta devamında Rusiye quvetçileri eñ azından altı insannı tutıp, olarnı Ukrainağa qoltutqan areketlerde qabaatladılar.
Qırım Muhtar Cumhuriyetindeki prezident temsilciligi bunı bildirdi.
Temsilcilik, keçken afta yüz bergen bir qaç taqip adisesi aqqında yazdı:
Qarasuvbazar şeeriniñ sakini Yuriy Oleksandrovıç Dutov içtimaiy ağlarda Ukraina Silâlı quvetlerine açıq qol tuttı ve Qırımnıñ işğalden qurtarıluvını bekley. Onıñ faal vatandaşlıq nazar noqtası közden qaçmadı: işğalciler Yuriyni tuttılar, onı videoğa çıqıp, afu soramağa mecbur ettiler ve uquq bozuluvı aqqında protokol tizdiler. Şimdi dava işğalli makemege yollanıldı.
Qurman rayonınıñ Tuvaqa köyüniñ sakini Süleyman Albertovıç Yusupov içtimaiy ağlarnı Rusiye işğalli akimiyeti ve şahsen Rusiye prezidentini, hususan Youtube blok etilgeni içün tenqit etmek içün qullana edi. Bu sebepten onı da tutıp aldılar, video vastasınen afu soramağa zorladılar ve 10 künge memuriy apiske aldılar.
Kezlev rayonınıñ Yalı Moynaq köyüniñ sakini Yehor Viktorovıç Sirin Rusiye prezidentiniñ areketlerinden memnün olmağanını açıq şekilde bildirdi. İşğalciler bunı körmemezlikke urmadılar: Yehornı tuttılar, kamera ögünde afu soramağa zorladılar ve 30 biñ rublelik para cezasını berdiler - bu aman-aman eki minilmal aylıqtır.
Aqyar şeeriniñ sakini Vira Mıkolayivna Yaroş, messeengerler vastasınen işğalcilerni tenqit etip, öz nazar noqtasını gizlemedi ve USQnıi qaytacağını bekley. Onı tutıp aldılar, kamera ögünde afu soramağa zorladılar, bundan soñ işğalli akimiyet protokol tizip, davanı "makeme"ge berdi.
Kezlev restoranlarından birinde Andriy Oleksandrovıç Luğovıy, "Ukrainağa şan-şeref!" kibi vatanperverlik şiarlarını seslendirdi. Bu sebepten onı da tutıp aldılar, videoğa soramağa zorladılar, protokol tizdiler ve davanı makemege berdiler.
Prezidentniñ Qırım Muhtar Cumhuriyetindeki Temsilciliginiñ malümatına köre, 2024 senesi berim ayınıñ 5-ne qadar vaqtınca işğal etilgen Qırımda "Rusiye Silâlı quvetleriniñ itibarını tüşürüv" maddesine binaen 966 dava qayd etildi. 862 davasında memuriy ceza şeklinde para cezası ya da başqa maddelerge istinaden bir davağa qoşuluv qararı çıqarıldı. 16 davasınıñ baqılması devam ete. Qayd etilgenine köre, qararlarnıñ 43%-i qadınlarğa, 57%-i ise erkeklerge qarşıdır. Para cezalarınıñ umumiy miqdarı eñ az 26,4 mln rusiye rublesine yetken.
Hatırlatamız ki, keçenlerde işğal etilgen Qırımda 52 yaşındaki Kefe rayonınıñ sakini "Rusiye ordusını itibardan tüşürüñiz" şiarını halq ögünde qıçırğan soñ tutuldı.
Telegram ve Facebookta Suspilne Qırım haberlerine abune oluñız
