Qırım sakinleri, berim ayınıñ 6-8. künleri işğalli akimiyet tarafından teşkil etilgen sahte saylavlarda iştirak etmege red eteler.
"Sarı şerit" areketiniñ Telegram kanalında bu malümat bildirildi.
Faalcilerniñ qayd etkenlerine köre, Rusiyeniñ qanuniylik ilziyasını yaratmaq ıntıluvlarına baqmadan, Qırım sakinleriniñ keyfi başqaca. Saylayıcılarnıñ çoqusı bu "saylavlarnı" körmemezlikke uralar, amma saylavğa esasen işğal etilgen topraqlarğa köçip kelgen ruslar keteler.
"Biz, daa qarar bermegen bütün Qırımnıñ sakinlerini bu SAHTE saylavlarnı körmemezlikke urmağa çağıramız", — dep "Sarı şerit" areketiniñ beyanatında qayd etildi.
Bu areketniñ iştirakçileri qayd eteler ki, narazılıq duyğusı yüksek qala ve Qırımnıñ sakinleriniñ çoqusı Rusiyeniñ Ukraina toprağında saylavlar keçirmek aqqını tanımay.
Olar qarşılıqnıñ devam etkeni, Qırımdaki insanlar unutılmağanı dep, dünyağa köstermek içün kütleviy haber vastalarını da vaziyetni aydınlatmağa çağırdılar.
Qorquzuvlarğa baqmadan, yarımada sakinleri işğalge qarşı tirenmege devam eteler, dep "Sarı şerit" faalcileri işanalar.
Şeerniñ soqaqlarında insanlarnıñ kerçek keyfiyetini areketniñ faalcileriniñ yapqanları pek çoq foto köstere. Qırımnıñ sakinleri muqavemet köstermege devam eteler, ve Aqmescitte narazılıq aktsiyaları sakinlerniñ başqa yolnı saylağanlarını isbatlay.
"Sarı şerit" areketiniñ faalcileri Qırım sakinlerini küçlü olmağa ve küreşni devam etmege çağıralar, çünki ğalebe qaçınılmaz.
Hatırlatamız ki, keçenlerde "Sarı şerit" areketiniñ faalcileri işğal etilgen Qırımnıñ Kezlev, Aqyar ve Aqmescit şeerlerinde aktsiya keçirdiler.
Telegram ve Facebookta Suspilne Qırım haberlerine abune oluñız
