Ukraina ortodoks Kilsesiniñ (UOK) Aqmescit ve Qırım Mitropoliti Klıment, işğal etilgen Qırımnıñ Kezlev şeerindeki ruslar tarafından viran etilgen Hrestovozdvıjenskıy kilsesiniñ yañı resimlerini kösterdi. Oraq ayınıñ 21-nde onı yoq etmege başladılar. Bu yarımadada soñki ukrain kilsesi edi.
Mitropolit, bu fotoresimlerni arman ayınıñ 30-nda Jurnalist Taqiqatları Merkezinen paylaştı.
Resimlerde UOKniñ tahtalı ibadethanesiniñ qalımtıları ve onıñ yanındaki kirlenilgen topraqlar kösterile. Kilse qalğanınen beraber, işğalcilerniñ parçalamaq içün qullanğan tehnika tura.
Hatırlatamız ki, Ukraina Yuqarı Şurasınıñ insan aqları vekâletlisi Dmıtro Lubinets, işğal etilgen Qırımnıñ Kezlev şeerindeki kilseniñ qanunsız şekilde yıqılması boyunca rusiyelilerniñ areketlerini takbih etip, "ukrain halqına qarşı muntazam repressiyalarnıñ nevbetteki şaatı" dep adlandırdı.
Aynı vaqıtta Ukraina Medeniyet ve malümat siyaseti nazirligi UNESCOğa muracaat etip, bu aktnı diniy genotsid olaraq qayd etti, dep Suspilne Qırımğa Medeniyet nazirliginiñ başı vazifelerini vaqtınca eda etken Rostıslav Karandeev bildirdi.
"Bu kilse Kezlevniñ yatma rayonında, pedagoglar ve terbiyeciler yaşağan eki yataqhaneniñ arasında quruldı. Onı bu sene oraq ayında çıqarmağa başladılar. Şimdi qubbeni alıp taşladılar, bezeklerni alıp taşladılar ve kün-künden kilseniñ divarları olğan tahta töşeklerni temelden alıp taşlaylar", — dep arman ayınıñ ortasında yerli sakin Suspilne Qırımğa añlattı.
Kezlevdeki UOKniñ Hrestovozdvıjensk kilsesi aqqında ne bilemiz
Kezlevdeki Hrestovozdvıjensk kilsesi Qırım işğal etilmeden evel 2014 senesi qadimiy ğarbiy ukrain kilsesiniñ tipik leyhası boyunca qurulmağa başladı — bütün elementler elnen yapıldı, onı mıhlar, skobalar ve zemaneviy şaraitte qullanılğan başqa elementler qullanmadan qurdılar, dep Ukraina pravoslav kilisesiniñ matbuat hızmeti bildirdi.
UOKde buña uyğun vesiqalar bar. Bu kiçik ağaç ibadethane ya da, cemaatnıñ adlandırğanları kibi, kilse-çasovnânı cemaat özü qurğan.
İşğalden soñ ruslar onı yıqmaq içün çoq areket ettiler. Bundan da ğayrı, 2014 senesi kilseniñ qubbesi yaqıldı, soñra onı yañıdan qurdılar.
Yepiskop Klıment ukrain kütleviy haber vastalarına haber etti ki, kilseniñ yıqılmasınıñ teşebbüsçisi işğalli qırım halqınıñ «Qırımçaqlar» Qırım cumhuriyetiniñ medeniy-maarif cemiyetiniñ «reberiniñ muavini» Purım M.İ. oldı.
2019 senesi boş ayda işğalli Kezlev şeer makemesi Ukraina pravoslav kilisesiniñ bu ağaç kilsesini yıqmağa emir etti, bu ise «Kezlev idaresiniñ» «belediye topraqnı boşatuv ve qurulğan qurulışnı yıquv işlerini yapmaq» talabını bildirdi.
2020 senesi oraq ayınıñ 23-de Aqmescit ve Qırım UOKniñ arhiyepiskopı Klıment Qırımnıñ «makeme taqiqatçısı hızmetiniñ» emrini aldı. Kezlevdeki UOKniñ kilsesi beş kün içinde yıqmağa qarar alındı. İşğal memuriyetiniñ boşatmağa talap etkeni yerniñ meydanlığı 30 kvadrat metr edi.
2024 senesi oraq ayında Kezlev şeeriniñ işğal memuriyeti ukrain kilsesini yıqmaq maqsadınen ruhset almaq içün Qırım Cumhuriyetiniñ Kezlev şeer makemesine muracaat etti.
Kezlevdeki UOKniñ Hrestovozdvıjensk kilsesi aqqında ne bilemiz
İşğal etilgen Qırımnıñ Kezlev şeerinde oraq ayınıñ 21-nde ruslar yarımadada soñki ukrain kilsesini — Ukraina Ortodoks Kilsesiniñ Hrestovozdvıjensk kilsesini yoq etmege başladılar. Ukraina Ortodoks Kilisesinde bildirdiler ki, Rusiye Qırımda ukrainlerniñ genotsidini devam ete, er şeyni yasaq ete ve yoq ete, şu cümleden bu kilseni de.
Ukraina Ortodoks Kilisesiniñ Qırım yeparhiyasınıñ vekâletli temsilcisi Andriy Şçekun qayd etkenine köre, ukrainler susıp qalmamalılar, milliy ve halqara meydanlarda Rusiye cinayetleri aqqında aytmalılar, Rusiye tarafından başlatılğan genotsid cenkine cevap bermeliler.
Aynı zamanda Ukraina Baş prokurorınıñ sabıq muavini Gündüz Mamedov, IV. Jenevre şartnamesine binaen, işğal etilgen topraqlarnıñ vatandaşları öz diniy işançlarına ürmet köstermek aqqına malik, işğalci bir devlet ise diniy hızmetçilerge dindaşlarına maneviy destek köstermege izin bermeli, dep qayd etti.
Ukraina prezidentiniñ Qırım Muhtar Cumhuriyetindeki temsilciligi, dünyanı yarımadada işğalcilerniñ Ukraina Ortodoks Cemiyetini taqip etüvini ve ibadethanelerni yoq etüvini takbih etmege ve aynı uquqlarnıñ daa bir bozuluvına cevap bermege çağırdı.
Oraq ayınıñ 22-nde Qırım Muhtar Cumhuriyeti ve Aqyar şeeriniñ prokurorlığı cenk qanunları ve adetlerini bozğanı içün Kezlevdeki Hrestovozdvıjensk Kilsesiniñ yoq etilüvi sebebinden cinaiy dava açtı.
Telegram ve Facebookta Suspilne Qırım haberlerine abune oluñız
