Arman ayınıñ 29-nda işğal etilgen Qırımnıñ Bağçasaray şeerinde siyasiy mabüs Seyran Saliyevniñ anası ve qırımtatar areketiniñ faalcisi Zodiye Saliyevanıñ evine FSB hadimleri keldiler. Olar "makeme" qararına köre, tintüv keçirecek ediler. Onıñ cep telefonını tutıp aldılar ve Aqmescitke alıp kettiler.
"Qırım birdemligi" cemaat teşkilâtı Facebookta bunı bildirdi.
"Saba saat 7-de oña kelip çıqtılar. Biri evine kirdi, üçü maşinada otura edi. Makeme qararına binaen teşkerüv keçirecek ediler, amma adres yañlış yazılğan edi", — dep bildirildi.
Onıñ kelini — uquq qorçalayıcı ve jurnalist Mümine Saliyeva Zodiyeniñ yaşağanı yerge barıp yetişti.
"Qararda yañlış adres yazılğan edi. Onıñ içün dairege kirmediler, amma telefonını aldılar", — añlattı o, dep uquq qorçalayıcı Lütfiye Zudiyeva Facebook saifesinde haber berdi.
Zudiyeva şunı da qoştı ki, bu sene siyasiy mabüsniñ anasınıñ 70. doğğan künü qayd etildi.
Bundan soñ "Qırım birdemliginiñ" mühabirleri, işğal etilgen Aqmescitteki FSB idaresiniñ binasına advokat Edem Semedlâyev kelgeni ve endi nevbetçige muracaat etip, kiriş yanında beklegenini bildirdiler.
Hatırlatamız ki, tutulğan qadınnıñ oğlu — "Hizb ut-Tahrir davası"nıñ ekinci Bağçasaray gruppasınıñ mabüsi Seyran Saliyev. İşğalciler onı müstemlekede 15 senege üküm ettiler.
"Hizb ut-Tahrir davası"nıñ ekinci Bağçasaray gruppası aqqında ne bilemiz
2017 senesi orta küz ayınıñ 11-nde Rusiye FSB işğal etilgen Bağçasarayda altı qırımtatarnı tuttı: Timur İbragimov, Marlen (Süleyman) Asanov, Memet Belâlov, Seyran Saliyev, Server Zekiryayev ve Ernes Ametov.
Bir seneden soñ, 2018 senesi mayısnıñ 21-nde, işğalciler Edem Smailov ve Server Mustafayevni evlerinde tutıp aldılar.
Olarnı Rusiyede yasaqlanğan, amma Ukraina ve dünyanıñ ülkeleriniñ çoqusında serbest faaliyet köstergen Hizb ut-Tahrir islâm siyasiy firqasınıñ faaliyetinde qabaatlaylar.
Tutulğanlarnıñ episi işğalli Kıyiv rayon mhkemesiniñ qararındn apiske alındı ve tahminen üç sene taqiqat izolâtorında tutuldı.
2022 senesi berim ayınıñ 16-nda Rostov-na-Donudaki Cenübiy bölge arbiy makemesinde bu dava üzerinde üküm çıqarıldı. Onıñ qabaatlıları 13-19 sene apis cezasına maküm etildi.
022 senesi saban ayınıñ 14-nde Vlasiha şeerindeki Apellâtsiya arbiy makemesi imayeciniñ şikâyetlerini aman-aman bütünley red etti ve mabüslerniñ apis müddetlerini aman-aman deñiştirmedi. Seyran Saliyevniñ apis cezası bir senege qısqartıldı - 15 senelik müstemleke cezasına, Ernes Ametovnıñ apis cezası lâğu etildi.
Avropa parlamenti öz rezolütsiyasında Rusiye Federatsiyasını bütün ukrain siyasiy mabüslerini, şu cümleden "Hizb ut-Tahrir davası"nıñ ekinci Bağçasaray gruppasınıñ mabüslerini azat etmege çağırdı.
"Memorial" uquq qorçalayıcı merkezi olarnı siyasiy mabüsler olaraq tanıdı ve Rusiyeni olarnı acelen azat etmege çağırdı.
Telegram ve Facebookta Suspilne Qırım haberlerine abune oluñız
