Oraq ayınıñ 11-nde Tuna suvlarında Ukraina havfsızlıq hızmeti çetel yük gemisini ve onıñ kapitanını tuttı, olar Qırımdan ukrain ububatını çıqarıp, Rusiyege satqanında şübeli sayıla.
"USKO MFU" gemisi Kamerun bayrağı altında yüre edi. UHHniñ hadimleri Devlet sıñır hızmetiniñ deñiz qoruv bölüklerinen beraberlikte gemige tüştiler. Uquq qorçalayıcılar USKO MFU gemisine ekstremal şaraitte – gemi ketkende – kettiler.
Mahsus operatsiyada iştirak etken UHHniñ hadimi, Suspilne Qırımğa mahsus operatsiyanıñ tafsilâtlarını añlattı.
"Gemide Ukrainanıñ içki suvları olğan, yani Ukrainanıñ mustaqil toprağı olğan Tuna özeniniñ qısımlarından keçmek kerek edi, şunıñ içün onı yaqalamaq içün uquqiy ve kerçek imkânlar olacaq", — dep UHHniñ Qırım MCdeki Bİniñ hadimi añlattı.
"Barıştırıcı" Merkeziniñ SeaKrime leyhasınıñ taqiqatçısı Katerına Yaresko, 2023 senesi boş aydan başlap, geminiñ areketini taqımnen beraber taqip etkenlerini bildirdi.
"Biz onıñ aqqında bütün malümatnı topladıq. Onıñ aqqında maqale yazdık. Biz er vaqıt jurnalistik maqaleler yazmaymız, çünki er vaqıt malümatnı tasdıqlap olamaymız. Bizim bütün delillerimiz bar edi. Ne yükleycekleri, ne yerge ketecekleri, kim yükleycegi ve ilâhre bilemiz. Kapitanını tayinledik ve maqale neşir ettik. İşte gemi. Oraq ayınıñ 7-nde o AİSni söndürdi. Bu, uquq qorçalayıcı organları tarafından tutulğan soñ bunı yaptı", — dep Yaresko qayd etti.
Oraq ayınıñ başında taqiqatçılar, uquq qorçalayıcılarğa "USKO MFU" gemisiniñ Moldovağa doğru Tuna boyu ketkenini ve o yerden qaytqanını bildirgen ediler. Olar ise geminiñ yolunı taqip etip başladılar.
"Biz çeşit vaqialarğa azırlana edik. Şu cümleden, geminiñ taqımı qanuniy toqtatuv talabını körmemezlikke urıp, Ukraina içki suvlarını terk etmege tırışa bilecegini tüşündik", — dep mahsus operatsiyanıñ itirakçisi qayd etti.
Ukraina havfsızlıq hızmetiniñ hadiminiñ aytqanına köre, taqip aqqında bilgende, kapitanı da aynısını yapmağa tırışqan edi.
"Geminen radio vastasınen bağlandıq, başta onıñ temsilcilerinen bağlanıp, toqtamağa ve közetüv gruppasını almağa azır olğanlarını bildirdiler. Lâkin kapitanınıñ areketleri aksineni kösterdiler. O, qanuniy toqtatmaq talaplarını körmemezlikke urdı ve aksine eñ tez şekilde yaldap areket etti", — dep añlattı o.
Qaça bilmdiler, uquq qorçalayıcılar gemisi toqtattılar, taqımını tuttılar.
"Qapılğan deliller esasında UHHniñ Qırım MCdeki Baş idaresiniñ taqiqatçıları, Qırım MC Prokurorlığınıñ protsessual reberleri tarafından mezkür geminiñ kapitanı vaqtınca işğal etilgen Ukraina toprağına kiriş ve çıqış tertibiniñ bozuluvı sebebinden şübeli sayıla. Taqiqat, yük gemisiniñ kapitanı Cenübiy Kavkaz memleketlerinden biriniñ vatandaşı olğanını tasdıqladı", — dep UHHniñ Qırım MCdeki Bİniñ taqiqatçısı añlattı.
Katerına Yaresko, Ukraina uquq qorçalayıcıları tarafından tutulğan gemi aqqında daa çoq añlattı.
"Mayısnıñ soñunda gemi Türkiyeniñ limanından tuz ketirip, Aqyarnıñ Qamış körfezine kirdi. Yüklenip çıqtı, AICni açtı ve Romaniya yalısı altında ketti. İlk eki sefer gemide olğan kapitan başqa kapitan edi, yani, onıñ içün bu işğal etilgen Qırımğa yolu ve sıñırdan qanunsız keçüv teşkilâtı ilk edi", — dep SeaKrime leyhasınıñ taqiqatçısı añlattı.
Taqiqatçı şunı qayd etti ki, böyle areketler içün geminiñ kapitanına 3 seneden 5 senege qadar apis cezası berile bilir. Şimdi o ve 12 çetel adamından ibaret olğan taqım apiske alınğan gemide buluna.
"Şimdi makemeden evelki taqiqat devam ete, bir sıra makeme ekspertizası keçirile. Tintüv vaqtında alınğan deliller baqıla. Şu cümleden, onıñ qanunsız faaliyetini isbatlağan kâğıtlarnen beraber çalışqan kompyuter tehnikası", — dep hulâsa çıqardı o.
UHHniñ taqiqatçısınıñ aytqanına köre, bu esnasqa halqara taşımalarda ihtisaslaşqan ecnebiy ticariy qurulışlar celp etildi. Ve bu tek bir shema degil. Qırım UHHniñ bildirgenine köre, işğal etilgen topraqlardan hırsızlanğan aşlıqnıñ qanunsız çıqarılmasında iştirak etken 20-den çoq geminiñ kapitanı şübeli sayıla.
Qırım Muhtar Cumhuriyeti ve Aqyar şeeriniñ prokurorlığı Suspilne Qırımğa añlatqanlarına köre, mahsus makeme oturışınıñ – maküm etilgen şahıs olmağan taqdirde ("ğıyabiy" ükümler) – neticelerine köre, çıqarılğan ükümler yani apellâtsiya şikâyetini berüv müddeti bitecek soñ (30 kün içinde) qanuniy küçüni ala.
Appelâtsiya şikâyeti berilecek taqdirde, makeme qararı lâğu etilmese, appelâtsiya makemesiniñ qararından soñ qanuniy küç ala.
Aynı zamanda, maküm etilgenniñ ceza müddeti tutuluv vaqtından başlana.
Telegram ve Facebookta Suspilne Qırım haberlerine abune oluñız
