İşğal etilgen Qırımnıñ Qarasuvbazar rayonında Tayğan yapma gölüniñ suv seviyesi pek tüşkeni sebebinden Büyük Qarasuv özenine suv tökülmesi toqtatıldı.
Qırım.Aqiqatqa telükesizlik sebebinden adı bildirilmegen yerli yer mütehassısı bunı añlattı.
"Vaziyet pek telükeli. Aslında, Qırımnıñ eki strategik emiyetli yapma gölüniñ (Qarasuvbazar ve Tayğan yapma gölleri — muar.) suv seviyesi tüşip qala. Bu yapma gölleri Şimaliy-Qırım kanalına suv bergen Büyük Qarasuv özeniniñ esas suv teminatıdır. Ve ilk sefer yaz mevsiminde böyle bir şey olğanını hatırlayım. Qırımğa Özüden suv berilmegeni sebebinden böyle bir şey olmadı dep aytmayım, amma küzde ve quru senelerde böyle şey edi", – dep yer mütehassısı añlattı.
Onıñ sözlerine köre, bu vaziyetniñ üç esas sebebi bar.
"Bu yıl pek quru edi, baar ve yaz devamında yağanaqlar yağmadı, şunıñ içün Qarasuv Baş özeniniñ suv seviyesi tüşti, onıñ suvı Qarasuvbazar ve Tayğan yapma göllerini toldura. Ekinci sebebi – anomal sıcaqlıq, yapma gölleriniñ yüzeyinden buharlanuvınıñ arttırılmasına sebep oldı, em de yerastı suvlarnıñ baqıluvı, suvnı suv astından çeküvniñ arttırılmasına sebep oldı. Üçünci sebebi – Qırımnıñ cenübiy-şarqınıñ suvğa ihtiyaclarına suv tökülmesidir", – dep yer mütehassısı añlattı.
Hatırlatamız ki, işğal etilgen Qırımda yarımadanıñ cenübiy-şarqını suvnen temin etmek içün strategik emiyeti olğan bölgede eñ büyüklerden biri olğan Qarasuvbazar yapma gölü bar. Faalci Suspilne Qırımğa, bu yañı suv buhranınıñ yaqınlaşqanını köstere, dep bildirdi.
Telegram ve Facebookta Suspilne Qırım haberlerine abune oluñız
