İşğalciler, "Hizb ut-Tahrir davasu"niñ ekinci Aqmescit gruppasınıñ qırım siyasiy mabüsi, 17 senege üküm etilgen faalci Raim Ayvazovnı Ulyanovsk vilâyetiniñ Dimitrovgrad apishanesinden Arhangelsk vilâyetiniñ VKtüzetici müstemleke-21ge etap ettiler.
O, apishaneniñ "Zonatelekom" bağı ve telefon vastasınen apayı Mavile Ayvazovğa bunı bildirdi, dep "Qırım birdemligi" yazdı.
Siyasiy mabüsniñ apayı oña uzun bir etap olğanını ayttı. Apishaneden onı Ulyanovsk SİZOsına alıp kettiler, anda doquz kün keçirdi. O, Kazan, Perm ve Yaroslavlden keçip kete edi.
"Yazıq ki, aqayım evden uzaqlıqta. Apiske alınğan soñ, men Raimniñ apis müddetini evge yaqın yapması içün ariza yazdım, lâkin men red cevabını aldım", — dep Mavile añlattı.
Siyasiy mabüsniñ etapı vaqtında babası vefat etti. Raim Aivazov içün onıñ ölümi aqqında haberni qabul etmek zor edi.
"Raimniñ babası vefat etkende, aqayım etapta edi. Babasınıñ ölümi onıñ içün ağır edi", — dep Ayvazovnıñ apayı añlattı.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Raim Ayvazov aqqında ne bilemiz
2019 senesi baar mevsiminde Aqmescit rayonınıñ sakini, "Qırım birdemligi" birleşmesiniñ faalcisi Raim Ayvazov "Armânsk" Rusiye memuriy keçit noqtasında ğayıp oldı. O, apiske alınğan qırımtatar faalcilerine SİZOğa şeylerni yollamağa yardım ete edi. Qorantası ve dostları onıñnen bağ coyıp, 10 saat devamında ne olğanını bilmey ediler.
Ertesi künü Ayvazov, onıñ qız qardaşına telefon etip, FSBniñ işğalli idaresinde bulunğanını haber etti.
2019 senesi çiçek ayınıñ 18-nde Aqmescitniñ Kıyiv rayon makemesi onı terror teşkilâtında iştirak etmege qabaatlap apiske aldı.
Ekinci Aqmescit gruppasınıñ mabüslerini taqip etüv 2019 senesi saban ayında başlandı. Olarnı "Hizb ut-Tahrir teşkilâtı"nda ya da "Hizb ut-Tahrirde iştirak etmege" qabaatladılar. 2022 senesiniñ başında Rusiye işğalli prokurorı bu davanıñ beş iştirakçisine 16 seneden 18 buçuq senege qadar apis cezalarını berdi. Söz Remzi Bekirov, Riza İzetov, Şaban Umerov, Raim Ayvazov, Farhod Bazarov aqqında kete.
2022 senesi saban ayınıñ 10-nda Cenübiy bölge arbiy makemesi, beş qırımtatar adamı içün qabaatlayıcı üküm çıqardı. Uquq qorçalayıcı Riza İzetov ve vatandaş jurnalisti Remzi Bekirov 19 senege, "Qırım birdemligi" faalcileri Farhod Bazarov, Raim Ayvazov ve Şaban Umerov ise 15, 17 ve 18 senege üküm etildi.
Telegram ve Facebookta Suspilne Qırım haberlerine abune oluñız
