"Hizb ut-Tahrir davası"nıñ ekinci Aqmescit gruppasınıñ mebüsi, qırımtatar faalcisi Vladlen Abdulkadırovnı oraq ayınıñ 11-nde Rusiye Federatsiyasınıñ Arhangel vilâyetindeki İks köyündeki 21. apishanege etap ettiler. O, işğal etilgen Qırımda qorantasından aman-aman 3 biñ kilometr uzaqlıqta buluna.
Bunı oraq ayınıñ 30-nda onıñ apayı Gülzar Abdulkadırova Facebookta bildirdi.
2022 senesi mayıs ayında 12 sene sert rejimli müstemlekege üküm etilgen qırım siyasiy mabüsinden rusiyeliler onı Rusiyeniñ Lipetsk vilâyetindeki Yelts apishanesinde tuta ediler.
"Makeme qararından soñ makeme esnasları bitmey. Oraq ayında makeme (2024 senesi - muar.) Abdulkadırov Velini etap etti. Tek Arhangelsk vilâyeti olğanını bile edik. Bir aftadan soñ, aqayım Arhangelskte olğanını haber etken mektüpni aldım", - dep yazdı Kreml mabüsiniñ apayı.
Abdulkadırovnıñ mektübinde o, yolda 70 saattan çoq bulunğanını ve yolunıñ ne qadar qıyın olğanını ayttı.
"Yüzlernen kilometrni tar araba ve vagonlarnen keçken yorultqan yol. Etap 8 şahsiy eşyalarnıñ tintüvinen ve 70 saatlıq yolculıqnen beraber keçirildi. Moskvağa kelgen soñ, sıcaqta olar 3 saat trenni beklediler, amma Tverde tren 23 saat turğan soñ, bu çoq degil edi", - dep qayd etti siyasiy mabüsniñ apayı.
Bundan da ğayrı, bir qaç kün evelsi bir adam Gülzarnen "Zonatelekom" vastasınen bağlanıp, onıñ "er şey yahşı" olğanını ve Arhangelsk vilâyetiniñ İks köyüniñ Plesetsk rayonına kelgenini ayttı.
Vladlen Abdulkadırov aqqında ne bilemiz
Qırımtatar Vladlen Abdulkadırov Özbekistannıñ Namangan şeerinde işçi qorantasında doğdı. 2001 senesi Qırımğa qayttı.
2016 senesinden başlap, apiske alınğanına qadar, faal balalarnıñ ananeviy bayramlarını, şu cümleden Qurban ve Oraza bayramlarını teşkil ete ve keçire edi, Aqmescit rayonınıñ Stroganivka köyüniñ abadanlaştıruvında iştirak ete edi. Meselâ, o ve qomşuları, apiske alınğanı sebebinden qurulışı bitirilmegen bala meydançığınıñ qurulışını qoydılar.
Bundan da ğayrı, Abdulkadırov qırım siyasiy mabüsleriniñ qorantalarına yardım ete edi, qırımtatar halqınıñ vekillerine qarşı makeme oturışlarına bara edi, siyasiy mabüsler içün SİZOğa berilüvlernen oğraşa edi.
2019 senesi martnıñ 27-nde Rusiye quvetçileri Qırım işğali başlağanından berli qırım musulmanlarınıñ evlerinde keçirilgen eñ büyük tintüvler neticesinde 25 qırımtatar cemaat faalcisini tuttılar, olarnıñ arasında Vladlen Abdulkadırov da bar edi. Olarnı "Hizb ut-Tahrir" islâm siyasiy firqasınıñ iştirakçisi olğanlarında qabaatladılar.
2022 senesi mayısnıñ 12-nde Rostov-na-Donudaki Cenübiy bölge arbiy makemesi siyasiy mabüs Vladlen Abdulkadırovnı 12 senege üküm etti. Daa soñ Moskva civarındaki Vlasiha şeerindeki Apellâtsiya arbiy makemesi ükümni deñiştirmedi.
"Hizb ut-Tahrir davası"nıñ ekinci Aqmescit gruppası aqqında ne bilemiz
2019 senesi saban ayınıñ 27-sinde Qırımda qırımtatarlarnıñ evlerini kütleviy şekilde tinttiler. Aqmescit rayonınıñ Bavurçı, Mamaq, Yañı Abdal meskün yerlerinde taqiqat işleri yapıldı. İşğalciler, 20 qırımtatar adamını Hizb ut-Tahrir halqara siyasiy fırqasına ait olmakta qabaatlatıp tuttılar.
Rus mahsus hızmetleri daa üç insannı qıdırmağa ilân ettiler. 2019 senesi saban ayınıñ 28-inde Rusiyeniñ Rostov vilâyetiniñ Aqsay şeerinde daa üç qırımtatar adamını tutqanını bildirdiler. Tutulğan adamlar arasında "Qırım birdemligi"niñ içtimaiy jurnlisti Osman Arifmemetov da bar edi.
Aynı kün işğal etilgen Aqmescitteki Kıyiv rayon makemesi, tutulğan adamlarnı tevqif etip maküm etti.
2019 senesi yaz mevsiminde "Hizb ut-Tahrir davası"nıñ bu gruppasında tutulğan insanlarnıñ sayısı 25ke arttı. Tutulğanlar arasında "Qırım birdemligi" içtimaiy uquq qorçalayıcı areketiniñ faalcileri çoq edi. Olar, Qırımda siyasiy sebepli taqipler fedalarını qorçalamağa yönelten faal işinen bellilerdi. Olar arasında uquq qorçalayıcılar, içtimaiy jurnalistler ve gönüllüler bar.
Çoq bilgi olğanı sebebinden işğalciler 25 iştirakçinen cinaiy davanı beşer gruppağa böldiler.
2022 senesi boş aynıñ 24-ünde Rostov-na-Donudaki Cenübiy bölge arbiy makemesi, davanıñ iştirakçilerini terror faaliyetinde ve akimiyet zapt etmekte qabaatlı tanıdı. Enver Ametov ve Yaşar Müedinov 13 senege, içtimaiy jurnalistler Roslan Süleymanov, Rustem Şeyhaliyev ve Osman Arifmemetov 14 senege maküm etildi. Siyasiy mabüsler dört sene apishanede geçirecek soñ bir sene areket sıñırlanmaları astında olacaqlar. Qabaatlanğan adamlar öz qabaatını tanımadılar ve taqip etilgenlerini siyasiy olğanını tüşüneler.
Hizb ut-Tahrir — islâm siyasiy firqasıdır. 2003 senesi Rusiyede bu teşkilât terror teşkilâtı olaraq tanındı, onıñ iştirakçileri taqip etildi. İştirakçilerni "anayasağa qarşı faaliyet"te ve "dünya halifeligini" meydanğa ketirmek ıntıluvında qabaatlaylar. 2014 senesi Qırım işğal etilgen soñ işğalciler öz qanunlarını işğal etilgen Qırımğa da tarqattılar. Qırım musulmanları da Hizb ut-Tahrirge alâqası bar olğanında qabaatlana ve yarımadanıñ işğaline razı olmağan qırımtatarlarğa qarşı basqını arttıra.
Telegram ve Facebookta Suspilne Qırım haberlerine abune oluñız
