Rusiye Mudafaa nazirligi, oraq ayınıñ 23. gecesi Qırım ve Qara deñiz üzerinde 21 uçucısız aletni yoq etkenini bildirdi.
Oraq ayınıñ 23. sabası Rusiye mudafaa nazirligi öz Telegram kanalında bunı bildirdi.
Yarımada üzerinde olğan dronlardan ğayrı, Rusiye ava mudafaası quvetleri Rusiyeniñ aşağıdaki rayonlarında uçucısız aletlerni yoq ettiler:
— Belhorod vilâyetiniñ üzerinde — eki;
— Brânsk vilâyetiniñ üzerinde — eki;
Bundan da ğayrı, Aqyarnıñ gubernatorı Mihail Razvojayev, oraq ayınıñ 23. gecesi işğal etilgen yarımada üzerinde 15 uçucısız aletni tüşürgenlerini bildirdi. Bunı o Telegramda bildirdi.
"Aqyarda Ava mudafaası quvetleri ve REB bölükleri uçucısız aletlerniñ ücümini toqtattılar. İlk malümatlarğa köre, Şimaliy taraf ve Fiolent rayonında askerler, suv üzerinde 15-ten çoq uçucısız aletni yoq ettiler", — dep bildirildi.
Razvojayevniñ aytqanına köre, bir uçucısız aletlerniñ parçaları yük maşnasınıñ camını sındırğan. Aynı vaqıtta ekinci uçucısız aletniñ parçaları evniñ yanında tüşti.
Bundan ğayrı, Aqyarnıñ işğalli yolbaşçısınıñ aytqanına köre, şeerdeki obyektler zarar körmedi.
Mudafaa quvetleri, bu malümatnı resmen tefsir etmediler.
Telegram ve Facebookta Suspilne Qırım haberlerine abune oluñız
