Qırım Muhtar Cumhuriyeti ve Aqyar şeeriniñ prokurorlığı "Qırım Cumhuriyeti qırımtatarlarınıñ bölge milliy-medeniy muhtariyeti" cemaat teşkilâtınıñ işğalli yolbaşçısına qarşı qabaatlav aktını makemege yolladı. Oña 12 senege qadar azatlıqtan marum etüv cezası ve mülkiyetiniñ musadere etilmesi üküm etile bile.
Muhtariyet prokurorolığınıñ Telegramdaki haberinde bildirildi.
O, duşmannen işbirlik faaliyetindeUkraina CQniñ 111-1. maddesiniñ 1. qısmı, istilâcı devletke yardım etüvdeUkraina CQniñ 111-2. maddesiniñ 1. qısmı ve Rusiye Federatsiyasınıñ Ukrainağa qarşı silâlı istilâsını aqlağanındaUkraina CQniñ 436-2. maddesiniñ 1. qısmı, qanuniy tanığanında ve red etkeninde qabaatlana.
Prokurorlıqnıñ bildirgenlerine köre, 2022 senesi çiçek ayında Ukraina vatandaşı "Rusiyeniñ dünya meydanında bulunmasını" muzakere etken teşviqiy matbuat vastalarından birine intervyü berdi. O, Qırım Ukrainanıñ toprağı olğanını da red ete. Umerov halqara liderlerni yarımadanı Rusiye Federatsiyasınıñ qısmı olaraq tanımağa çağırdı.
Bundan da ğayrı, Facebookta o, istilâcı devletniñ siyasiy rejimine qol tutqan ve "Rusiye Federatsiyasınıñ milliy lideri ve onıñ teşebbüs etkeni "SVO"ne qırımtatar halqınıñ qol tutuvı" aqqında aytqan videonı derc etti.
Makeme-tilşınas araştırması onıñ ifadelerinde Rusiye Federatsiyasınıñ silâlı tecavuzını aqlağan ve işğalli memuriyetniñ areketlerine qol tutqan qısımlar bar olğanını tasdıqladı.
Prokurorlıq şunı da bildirdi ki, 2022-2023 seneleri içtimaiy ağlarda Umerov, Ukraina toprağında cenk areketlerinde iştirak etken Rusiye Silâlı quvetleriniñ ayrı bölüklerine yardım toplav ve berüv aqqında malümat derc etken edi. Şu cümleden, adam Rusiye deñiz piyade askerleriniñ 810-ıncı ayrı gvardiya taqımı ve Sankt-Peterburg göñüllileri içün yardım toplay edi. Olarğa taktik urba, maddiy resurslar, kompyuter tehnikası ve ilâhre berildi.
Bu areketleri içün oña 12 senege qadar azatlıqtan marum etüv ve mal-mülkniñ musadere etilmesi üküm etile bile.
Telegram ve Facebookta Suspilne Qırım haberlerine abune oluñız
