Yanğıncılar, oraq ayınıñ 15-nden berli üç kün devamında yanğan işğal etilgen Qırımnıñ Köktebel ve Kefede Qaradağ qoruğında yanğınnı söndüreler. Yanğın sebebinden şübeli sayılğan yerli sakin qurucılıq işlerini alıp barğan edi.
Oraq ayınıñ 17-nde Rusiye Fevqulâde vaqialar nazirligi öz Telegram kanalında bunı bildirdi.
"Köktebelde açıq yanğınlarnı yoq ettiler", — dep bildirildi.
Rusiye uquq qorçalayıcıları, Köktebel köyündeki evlerniñ birisinde qurucılıq işleri yapqan 50 yaşındaki yerli sakinni, Qaradağ qoruğında 30 gektarlıq miqyaslı yanğınnıñ qabaatlayıcısı olaraq sayalar.
"Maden keskende, qığılçımlar sebebinden quru ösümlikler yanıp başladı. Adam ateşni öz başına söndürmege tırıştı, amma muvafaqiyetsiz oldı. Yanğın tez sürette qorulğan tabiat toprağına tarqalmağa başladı", — dep oraq ayınıñ 16. künü Rusiye FVNniñ resmiy vekili İrına Volk Telegramda yazdı.
Rusiye Federatsiyasınıñ Cianiy qanunnamesiniñ 261. maddesiniñ 1. qısmına binaen, şübelengen adamğa qarşı dava açıldı.
Bundan ğayrı, oraq ayınıñ 16. künü Rusiye FVN qayd etti ki, uçaqlar Köktebeldeki yanğınğa 388 tonna suv tökip yiberdiler.
Telegram ve Facebookta Suspilne Qırım haberlerine abune oluñız
