İşğal etilgen Qırımda Rusiye yañı silâ anbarlarını qura ve eski silâ anbarlarını, şu cümleden, "Kefe-13" özek silâ anbarını ğayrıdan tikley. Bu , işğalciler Kefe rayonından (evelki Kirov rayonı) silâ anbarlarını avuştırmaq içün Eski Qırım rayonındaki Ağarmış dağınıñ eteginde belli bir işlerni yapalar, bu yerlerge Ukraina Silâlı quvetleri tarafından defalarca darbe endirildi.
Oraq ayınıñ 16-nda Qırımtatar Maaliy Merkeziniñ (QMM) idaresiniñ reisi Eskender Bariiev FREEDOM telekanalınıñ canlı yayınında bunı bildirdi.
"O yerge (Ağarmış dağınıñ eteginde — muar.) olar vatandaşlarnı yibermeyler. Bir taraftan, olar, bu, qattı yaşayış çöplügini saqlamaq içün olğanını aytalar, başqa taraftan, qattı yaşayış çöplüginiñ saqlanuvı pek faal şekilde qorçalanmay. Ve bu sebepten bir şartlar bar, fikir bar ki, olar anda Kirov rayonından (Kefe rayonından — muar.) anda silâ anbarlarını avuştırmaq içün yañı anbarlar quralar. Çünki Kirov rayonı Ukraina Silâlı quvetleri tarafından defalarca darbelerge oğratıldı", — dep añlattı o.
Aynı vaqıtta Bariiev, "Kefe-13" özek silâsınıñ anbarınıñ Rusiye tarafından qısmen ğayrıdan tiklenilmesi aqqında cemaat Qırımınıñ sorğusına cevap olaraq Ukraina Mudafaa nazirliginiñ Baş istihbarat idaresinden kelgen malümatnı izaatladı.
Onıñ sözlerine köre, bu yönelişte Rusiye askerleri Ukrainağa qarşı cenk içün silâ toplamaq içün faal çalışalar.
"2014 senesinden başlap, özek silâsını yerleştire bilecek sovet devirinde qurulğan obyektlerni ğayrıdan tiklemege başladılar, dep defalarca aytqan edik. Aynı zamanda men şimdilik özek silâsınıñ Qırım toprağında olğanını tasdıqlap olamayım. Kefe aqqında laf olsa, işte bu Qızıltaş ve Köktebel rayonlarında, bu yönelişte, anda kerçekten de sovet devirinde azırlanğan böyle katakombalar bar, olar, şu cümleden, Eski Qırımğa qadar keteler", — dep QMMniñ başı qayd etti.
Telegram ve Facebookta Suspilne Qırım haberlerine abune oluñız
