İşğal etilgen Qırımda ruslar, şura devrinden qalğan "Kefe-13" özek silâsınen anbarını qısmen ğayrıdan tiklediler. Faqat şu anda mezkür obyekt, Rusiye Federatsiyasınıñ ordusınıñ adiy silâsını saqlamaq içün qullanıla.
Suspilne Qırımnıñ işğal etilgen yarımadada özek silâsınıñ barlığı aqqında soravına cevap olaraq Ukraina Mudafaa nazirliginiñ Baş istihbarat idaresi bunı bildirdi.
Bundan ğayrı, Bİİ qayd etti ki, işğal etilgen Qırımda işğalcilerniñ özek silâsını yerleştirgenleri obyektler yoq. Bundan başqa, qayd etilgen silânıñ iç bir taşıması qayd etilmedi.
2023 senesi qara qış ayında Ukraina MNniñ Bİİniñ vekili Andriy Çernâk haber berdi ki, soñ senelerde Qırımda işğalciler, yarımadanıñ toprağında özek silâsınen anbarnı ğayrıdan tiklemek içün çalışqan ediler.
Şu anda, Ukraina istihbaratınıñ malümatına köre, "Kefe-13" obyektiniñ qısmen ğayrıdan tiklenüvi yapıldı. Faqat, qayd etilgen obyekt adiy silâ saqlamaq içün qullanıla.
Bİİ qayd etti ki, taktik özek silâsınıñ taşıyıcıları uçaqlar, vertolötlar, em de Qırımğa yerleştirilgen suvastı gemiler, gemiler, katerler ola bilir. Şu cümleden, Qırımdaki işğalli raketa orduları ve topraq ordularınıñ top sordusı, raketa taqımlarınıñ operativ-taktik raketalarına ("İskander") saiptir, em de mahsus top atışları (özek top mermileri ve minaları) ve 152-mm ve 203-mm top sistemaları ve 240-mm minometlerine saip olğan top bölükleri bar.
Rusiye ava-kâinat quvetleriniñ arbiy-ava quvetleriniñ özek silâsı bar (uçaq bazasınıñ qanatlı raketalarnıñ arbiy qısımları, uçaq bombaları ve uçaq deñiz minaları), olarnıñ taşıyıcıları ameliy-taktik uçaqlarnıñ ücüm ve bombardıman uçaqları ola bilir (Su-25SM3. Su-24M. Cy-34. Mig-31K).
Bundan da ğayrı, ukrain istihbaratçıları qoştılar ki, S-300PM komplekslerinen donatılğan ayrı, mütenasip emirlernen belgilengen Ava mudafaası sistemalarınıñ bölükleri ola bilir. Şu cümleden, Rusiye arbiy-deñiz flotunıñ:
- deñiz raketaları ve sahil raketa kompleksleriniñ baş qısımları ve uruş blokları olmağan ADFnıñ özek silâsı;
- gemi ve katerlerge qarşı raketalarnıñ arbiy qısımları;
- arbiy silâ bölükleri ve arbiy torpeda ve raketa-torpeda bölükleri;
- lenger ve tüp minaları;
- yalı top ordularınıñ top silâsı;
- terenlik bombaları ve "dalğan" uçaq bombaları bar.
Aynı zamanda Bİİ, taktik özek silâsını qullanmaq içün işğal etilgen yarımadağa özek silâsını taşığan raketalarnıñ qoşma areketlerini qayd etmedi.
Kefe-13 — Şura devrinden qalğan Sudaq yanındaki Qızıltaşta yerleşken özek silâsınen anbardır. 1951 –1953 ss. Kefe-13 qurulğan edi. Obyektniñ qurucılığınıñ idarecisi – İçki işler halq komissarlığınıñ (NKVS) başı Lavrentiy Beriya.
Telegram ve Facebookta Suspilne Qırım haberlerine abune oluñız
