Aluşta ve cenübiy yalı boyundaki 14 köy gazsız qalğan gaz üleştirici ağda yanğından soñ müşterilerge gaz taminatı ğayrıdan tiklendi.
Qırımnıñ işğalli başı Sergey Aksönov bu aqqında haber berdi.
O qayd etti ki, böyle degen "Çernomorneftegaz"nıñ hadimleri, planlaştırılğan on kün yerine dört kün içinde fevqulâde vaqianıñ neticelerini yoq etip becerdiler.
"Saat 8:00den gaz üleştirici sistemağa gaz berile, aletler çalışmaqta", — dep bildirildi.
Hatırlatamız ki, Cumaaqşamı künü, oraq ayınıñ 6-da, işğal etilgen Aluşta civarındaki Çuqul köyünde gaz üleştirici ağda yanğın çıqtı. Aluşta memuriyetiniñ işğalli başı Galina Ognyeva bildirdi ki, ormanlarda da yanğın çıqtı.
Aluştada ve daa 14 köyde fevqulâde vaziyet sebebinden gaz teminatı toqtatıldı. Rusiye Fevqulâde vaziyetler nazirliginiñ malümatına köre, gaz borusınıñ köpründe teşikler peyda oldı ve yanğın çıqıp, ormanğa tarqadı.
Telegram ve Facebookta Suspilne Qırım haberlerine abune oluñız
