2023 senesi bozarğan aynıñ 5-nde Qırımtatar Milliy Meclisi, qırımtatar halqınıñ temsiliy organı olaraq uquqiy statusınıñ belgilenmesine dair vesiqalar paketini mütenasip organlarğa berdi, lâkin bir qarar daa alınmadı.
Tamır halqlarınıñ aqları ihtisasiy mehanizminiñ 17-nci sessiyasınıñ oturışında iştirak etkende Qırımtatar Maaliy Merkeziniñ (QMM) uquqçısı Lüdmiıa Korotkıh bunı bildirdi.
Öz çıqışında o qayd etti ki, tamır halqlarınıñ aqlarını qoruv er bir devletniñ, şu cümleden Ukrainanıñ, telükesizligi ve topraq bütünligini temin etmek içün pek müimdir. Uquqçı qayd etti ki, tamır halqlarınıñ aqlarını qorçalav - dünyada barışıqnıñ teminatıdır.
Korotkıh qoştı ki, tamır halqlarınıñ aqlarını yerine ketirüv meselesini muzakere etkende, bunıñ içün qullanıla bilecek aletler ve usullar olğanını añlamaq pek müimdir. Onıñ fikrine köre, bu, devletniñ siyasiy iradesi müim olğan yañı qanunlarnıñ qabul etilmesi ya da Anayasağa deñişmeler kirsetilmesinen bağlıdır.
QMMniñ uquqçısı qayd etti ki, qanunlarda uyğun qaideler ve printsiplerniñ qayd etilmesi müim, amma uyğun qararlarnıñ qabul etilmesi yeterli degil. O, bu qaidelerniñ yerine ketirilmesi ve ameliyatta semereli olması müim olğanını qayd etti.
"Misal olaraq, 2022 senesi arman ayında Ukraina Nazirler Kabineti Ukraina tamır halqlarınıñ temsil organlarınıñ uquqiy statusını belgilev yol-yoruğını qabul etti. 2023 senesi bozarğan aynıñ 5-nde Qırımtatar Milliy Meclisi, qırımtatar halqınıñ temsil organı olaraq uquqiy statusını belgilev vesiqalarını berdi, amma bir qarar daa qabul etilmedi", — dep añlattı o.
Aynı zamanda Korotkıh, yarımadanıñ işğalli akimiyeti qırımtatarlarnı tamır halqı olaraq tanımay ve olarnıñ vatanını Ukrainağa qarşı büyük cenk alıp barmaq içün meydançıq olaraq qullana, dep qayd etti.
"Tamır halqları ve olarnıñ aqları ükümetlerniñ ya da devletlerniñ siyasiy küreşte ve idare etici areketleri içün alet olmamaq kerek. Biz devletniñ ve onıñ temsilcileriniñ "yahşı niyetiniñ" esirleri olmamalımız. Tamır halqları öz aqlarını yerine ketirmek içün muntazam areketler ve devamlı qararlarğa muhtaclar", — dep Qırımtatar Maaliy Merkeziniñ uquqçısı hulâsa çıqardı.
Telegram ve Facebookta Suspilne Qırım haberlerine abune oluñız
