"Serbest Qırımğa mektüp" teşebbüsi çerçivesinde Akim Halimov, işğalciler tarafından diniy ve cemaat faaliyetinen oğraşqanı ve işğalli rejimge qarşı çıqqanı içün 12 senege apis cezasına maküm etilgen siyasiy mabüs Rustem Tairovnıñ mektübini oqudı.
Prezidentniñ Qırım Muhtar Cumhuriyetindeki Temsilciligi bu aqqında haber berdi.
Akim Halimov "Aqiqiy tarih" leyhasınıñ teşkilcisidir.
"Bugün onıñ sesini Rusiye tarafından qanunsız olaraq maküm etilgen Ukraina vatandaşlarına diqqat çekmek içün Rustem Tairov seslendire", — dep Temsilcilik qayd etti.
Temsilcilik qayd etti ki, şimdi Rustem Tairov Vladimir vilâyetindeki apishanede buluna, soñki malümatqa köre, işğalciler onı anda etap ettiler.
"Siziñ, Ukraina tarafdarı olğanları ve Rusiye tarafından Qırımnıñ işğaline qarşı çıqqanları içün qanunsız olaraq apiske alınğan Rustem Tairov ve Kremlniñ başqa mabüslerine qoltutuv sözlerini yazmaq imkânıñız bar", — dep Temsilcilik qoştı.
Nasıl qatılmaq mümkün?
— Ukraina Prezidentiniñ Qırım Muhtar Cumhuriyetindeki Temsilciliginiñ saytında siyasiy mabüslerniñ cedvelini ve tutuluv yerlerinen haritanı baqıñız.
— Bir mektüp yazıñız: öz adıñıznı aytıñız, özüñiz aqqında biraz tarif etiñiz ve ne içün yazmağa qarar bergenini aytıñız. Etrafıñızda ve dünyada olıp keçkenlerni yazıñız, filmler, kitaplar, seyaatlar, tabiat, iş aqqında yazıñız. Duygusal ya da komik ikâyelerni aytasıñız, teessuratlarıñıznı paylaşıñız.
ZMINAnıñ saytında mektüp yazmaq qaideleri aqqında daa çoq malümatnı ögrene bilesiñiz.
İstegeniñiz vastanen mektüp yollañız
Poçta adresi (yollama masraflarını yollayıcı ödey):
— İnsan aqları aqqında malümat merkezi, a/s V-539, Kıyiv ş., 01001.
— Email: [email protected].
Hatırlatamız ki, Rusiye tarafından qanunsız olaraq tutulğan siyasiy mabüslerge qoltutuv olaraq teşkil etilgen "Serbest Qırımğa mektüpler" aktsiyası 2024 senesiniñ soñuna qadar devam etecek.
"Hizb ut-Tahrir davası"nıñ ekinci Aqyar gruppası aqqında ne bilemiz
— 2021 senesi arman ayınıñ 17-nde Qırımnıñ Aqmescit, Bağçasaray rayonlarında ve Aqyarnıñ Balıqlava, Nahimov rayonlarında qırımtatar musulmanlarınıñ evlerinde kütleviy tintüvler keçirildi.
— Taqiqat tedbirleriniñ neticesinde beş kişi tutuldı. FSB hadimleri Aqyar şeeriniñ Nahimov rayonında faalciler Rustem Murasov ve Rustem Tairov, Aqyarnıñ Balıqlava rayonında Cebbar Bekirov, Bağçasaray rayonında faalciler Zavur Abdullaev, Qırımnıñ Aqmescit rayonında Raif Fevzini tuttılar.
— 2023 senesi mayısnıñ 31-nde Rostov-na-Donudaki Cenübiy bölge arbiy makemesi, "Hizb ut-Tahrir davası"nıñ ekinci Aqyar gruppasınıñ dört iştirakçisine üküm çıqardı.
— Cebbar Bekirov 17 senege üküm etildi, dört sene apis cezasını çekti. Rustem Murasov, Rustem Tairov ve Zavur Abdullaevge makeme 12 sene sert rejimli müstemlekede qalmasına üküm etti: ilk 4 senesini apiste keçirecekler.
— Ukraina Tış işleri nazirligi Rusiye makemesiniñ bu qararlarnı qanunsız qabul etkeni sebebinden narazılıq bildirdi.
"Hizb ut-Tahrir" - tek Rusiyede terrorist olaraq tanılğan islâm siyasiy firqasıdır. Bu teşkilâtnıñ azaları musulmanlarğa qarşı repressiyalar içün işğalli akimiyetni muntazam sürette tenqit ete ediler. Aynı zamanda Hizb ut-Tahrir dünyanıñ memleketleriniñ çoqusında, şu cümleden Ukrainada serbest olaraq çalışa.
Telegram ve Facebookta Suspilne Qırım haberlerine abune oluñız
