Bozarğan aynıñ 28. künü deñişüv çerçivesinde Ukrainağa qaytqan Qırımtatar Milliy Meclisiniñ başınıñ birinci muavini Nariman Celâl, evine yolu ve sağlıq alını añlattı.
Oraq ayınıñ 2. künü "Birleşken haberler" milliy telemarafonınıñ canlı yayınında Nariman Celâl bunı añlattı.
Sabıq siyasiy mabüs, adiy bir yataqta uyanıp, hayal etkeni er şeyni yapa bilecegine alâ daa inanmay.
O qayd etti ki, esirlikte bulunmaq ruhiy ceetten ağır edi, çünki adaletsizlik ve aşağılanuv, aqları ve insanlarğa nisbeten munasebeti körünmey edi.
"Sen küreşip, bir aqiqatnı aytmağa tırışqanda, insanlar ise cam ya da beton divar kibidir, bu pek qıyın. Şu makemeciler ya da prokuror oturalar, sanki seniñ içün, er kes içün añlaşılır kibi olarğa er şey açıq-aydın olğanını añlatasıñ. Menimce, olar içün de. Amma olar bu işni kene de yapalar. Bunı yaşamaq pek qıyın", — dep Qırımtatar Milliy Meclisiniñ başınıñ birinci muavini añlattı.
Bundan da ğayrı, o, balaları ve apayını qorçalamağa ya da ev meselelerini çezmege küçü yetmegeni içün pek qasevetlengenini qayd etti.
O, Rusiye apishanesinde medeniy yolnı keçkeninden emin. Onıñ aytqanına köre, o işkence çekmedi. Amma, menfiylik ve ruhiy basqı bar edi.
Celialniñ aytqanına köre, al-azırda özüni yahşı duya, amma bazı meseleleri bar, olarnı ekimlerniñ yardımınen çezmege tırışacaq.
"Özümni yahşı duyam. Büyük meselelerim bar olğanını aytmaycağım. Tibbiy teşkerüvni keçirmek kerek. Bazı meselelerim bar. Lâkin men em bedeniy, em de ruhiy ceetten normal bir aldam. Bazı meselelerim barç Men bellesem, yaqın kelecekte ekimlernen olarnı al etmege tırışacağım", — dep eski siyasiy mabüs qayd etti.
O, Belarus sıñırında olğan deñişüv ceryanını da tafsilâtlıca añlattı.
"Kerçekten de, Bazarertesi künü işke çıqtım, apishanede çalıştım, yarım kün çalıştım, işten çıqqan soñ meni işçiler alıp kettiler ve eşyalarımı toplamağa ayttılar", — dep Nariman añlattı.
Celial qayd etti ki, bundan soñ operativ hızmetiniñ yolbaşçısınen körüşti, ve o, Narimannı işten boşatacağını bildirdi.
"O vaqıt men işten boşatılğanımnı añladım. Bundan evel iç bir malümat yoq edi. Bir qaç saatten soñ meni Krasnoyarsk SİZOsına alıp ketken polis hadimleri keldiler, anda eki kün bir kamerada bekledim. Soñ meni alıp Belarusiye ve Ukraina sıñırına qadar ketirdiler", — dep Celâl qoştı.
O, FSB hadimleriniñ ozğaruvınen bağlanğan közleri ve kelepçelerinen SİZOdan deñişüvge ketti.
"FSB hadimleri yanıma kelip, közlerimni bağladılar, meni zıncırlandılar, ve biz evge, azatlıqqa, uzun, soñki yolnı başladıq. Bir kereden maşna naqliyatına keçtiler, soñra başqa birine, anda men artıq bu deñişüv yolundan keçken vatandaşımnıñ gruppasına qoşuldım. Belorusiyenen sıñırda, çünki anda deñişüv keçe edi, bizni mahsus askerler gruppası ya da birisi qabul etti, üç saat devamında bizni vertolötnen sıñırğa ketire ediler", — dep Qırımtatar Milliy Meclisiniñ başınıñ birinci muavini añlattı.
Celialniñ qayd etkenine köre, onıñ qolunda alâ daa izi bar. O, añlattı ki, deñişüv vaqtında Rusiye quvetçileri onıñ qollarını buğavlarnen bağladılar.
"O yerde vaziyet böyle edi, bizden buğavlarnı alıp, plastik zıncırlarnen ellerimni bağladılar. Ve o, onı insan bile dep aytmağa istemeyim, o, meni pek begenmedi, çünki men oña ne içün o qadar çoq bağlamaq kerekligini ayttım, o, qollarımnı o qadar şiddetli şekilde bağladı ki, qan aylanuvı bozulğan edi. Helikopterde, başqasına muracaat etip, qollarım yaralanacaq, dep plastik buğavlarımnı biraz büyütmege rica ettim", — qayd etti o.
Birazdan Narimannıñ plastik buğavları yımşatıldı, lâkin azatlıqtan bir qaç kün keçken soñ bile, onıñ izleri qalğan edi, dedi o.
Bundan da ğayrı, Qırımtatar Milliy Meclisiniñ reisiniñ birinci muavini qayd etti ki, onı azat eteceklerine er vaqıt inana edi. Ukraina prezidenti Volodımır Zelenskıynen körüşkende o, daima öz devletine inandığını qayd etti.
"Onı qorçalağan insanlarğa inanam, esirlikten bulunğan oğlan ve qızlarğa evlerine qaytmağa yardım etkenlerge inanam. Ve menim inancım, o endi tolusınen tasdıqlandı. Ve menimnen beraber apiske alınğan, ya da tanış olğan oğlanlarnıñ tuvğanlarına muracaat ettim, olar içün bu ümütni coymaları, pek müimdir", — dep qoştı o.
Bundan başqa, sabıq siyasiy mabüs Qırımnıñ işğalden azat etilmesine işana, çünki, onıñ sözlerine köre, Qırımnıñ pek çoq sakini yarımadanıñ işğalden azat etilmesini sabırsızlıqnen bekley.
Telegram ve Facebookta Suspilne Qırım haberlerine abune oluñız
