Ukraina aktöri ve rejissöri qırımtatar Ahtem Seitablaev, Kıyivdeki Ukrainanıñ Milliy tarih müzeyinde "Qırım hazineleri. Qaytaruv" sergisiniñ açılışını anons etti.
Ahtem Seitablaev Ukraina Medeniyet ve malümat siyaseti nazirliginiñ (MMSN) YouTube videosında bunı bildirdi.
Oraq ayınıñ 5-nde Kıyivde dört Qırım müzeyinden artefaktlar taqdim etilgen yekâne sergi açılacaq. Eksponatlar Ukrainanıñ Milliy tarih müzeyiniñ hazinesinde lâyıq yer alacaq, anda er bir vatandaş milliy mirasını öz közünen köre bilir.
Videoda aktör hatırlattı ki, deyerli 10 senedir "skit altını" içün makeme uruşları devam ete edi, ve niayet Ukraina tarihiy ğalebe qazandı.
"Asırlar devamında duşman mirasımıznı hırsızlay. Biz olarğa muqavemet köstermege devam etemiz. Vaqıt keldi, biz özümizni qaytaramız", — dep qırımtatar asıllı ukrain aktörı ve rejissörı Ahtem Seitablaev qayd etti.
Keçenlerde berilgen malümatqa köre, sergini ziyaret etekcekler 565 yekâne eserni körip olacaqlar. Olar arasında 19–21. asırlar devamında Qırımnıñ arheologik tedqiqatları vaqtında tapılğan qadimiy yunan, qadimiy Roma, skit, sarmat, hun ve got şeyleridir.
Sergi Ukrainanıñ Milliy tarih müzeyi divarlarında daimiy olacaq ve Qırım işğalden azat etilecegine qadar devam etecek, bundan soñ kollektsiyanı yarımadağa yollamağa planlaştıralar.
"Skit altını" nedir
2014 senesi kiçik aynıñ 6-da Felemenkte Allard Pirson müzeyinde "Qırım. Qara deñizdeki altın ada", gotlar, sarmatlar ve skitlerge bağışlanğan. Onı beş ukrain müzeyi yarattı:
— Ukraina tarihiy qıymetleri müzeyi (Ukrainanıñ Milliy tarih müzeyiniñ bölügi, Kıyiv);
— Tavrida Merkeziy müzeyi (Aqmescit);
— Bağçasaray tarihiy-medeniy qoruğı;
— Keriç tarihiy-arheologik qoruğı;
— "Tavriya Hersonesi" milliy qoruğı.
Sergi 13 mln yevro miqdarında sigorta qıymeti olğan 584 eksponattan ibaret edi (11,4 mln yevro – Kıyiv qısmı, 1,4 mln yevro – Qırım qısmı). 2014 senesi sabsan ayında Rusiye Qırımnı zapt etip, işğal etkeni içün, Ukrainağa Kıyiv müzeyinde olğan eksponatlar qaytıp keldi. Qırım müzeyleriniñ eşyaları Felemenkte qala edi.
2023 senesi bozarğan aynıñ 9-nda belli oldı ki, aman-aman 10 senelik makeme esnasından soñ Felemenkniñ Yuqarı makemesi Allard Personnıñ müzeyini "Qırım – Qara deñizdeki altın ada" sergisinden eksponatlarnı Ukrainanıñ Milliy tarih müzeyine bermege mecbur etti.
2023 senesi boş ayda "Skit altını" Felemenkten Ukrainağa qayttı. Kıyivge "Qırım: Qara deñizniñ altını ve sırları" sergisinde taqdim etilgen Qırımnıñ dört müzeyinden artefaktlar berildi.
2694 kilogrammlıq qadimiy hazinelerni yük maşnasınen Kıyiv-Peçersk Lavrasınıñ toprağına alıp ketirdiler. Degerliklerniñ identifikatsiyasını Kıyiv gümrükçileri Ukrainanıñ Milliy müzeyi hazinesinde keçirmege kerek ediler.
Telegram ve Facebookta Suspilne Qırım haberlerine abune oluñız
