Ukraina Arbiy-deñiz quvetleriniñ nutuqçısı Dmıtro Pletençuk bildirdi ki, soñ zamanlarda işğal etilgen Qırımnıñ yalı kenarlarında çoq insan yoq, amma telükege baqmadan bazı rus turist-tazminatçıları o yerge raatlanmağa ketmege devam eteler. O, ruslarnı tenbiyeledi ki, yarımadada "kimseniñ raat qaldırmaycağı" çoq arbiy obyekt bar.
Oraq ayınıñ 1. künü "Birleşken haberler" milliy telemarafonınıñ canlu yayınında Pletençuk bu aqqında haber berdi.
"Tünevin (bozarğan aynıñ 30. künü — muar.) raatlıq künü olğanına baqmadan, yalı kenarları boş edi. Amma köpür qapatılğan er vaqıttan soñ kibi yarımadadan ketken maşnalar nevbetini körmek mümkün. Buña köre aytmaq mümkün ki, birinciden çoq insan añlamadı. Ekinciden, qayd etmek kerek ki, Qırımda bu sanayı tazminatçılarnıñ yardımınen ayatta qala, çünki işhaneleri tarafından ya da bücetten bu seyaat ödene. Bunıñ içün olar, memuriy-komandan usulınen Qırımğa turistlerni alıp ketireler", — dep ayttı o.
Ukraina Silâlı Quvetleriniñ Arbiy-deñiz quvetleriniñ nutuqçısı rus turistlerini yarımadadan ketmege çağıra, çünki anda "kimseniñ raat qaldırmaycağı" çoq arbiy obyekt bar".
"Bunıñ içün netice çıqarıñız, lütfen, ve ayatıñız ve sağlığıñıznı saqlamağa yardım etkecek qarar alıñız", — dep qayd etti o.
Aynı zamanda Rusiye turizm sanayısı birliginiñ bilgilerine (RTB) köre, bozarğan aynıñ 23. künü işğal etilgen Aqyarnıñ Üç Quyuda rus Ava mudafaası sisteması çalışqan soñ raketalarnıñ parçaları tüşken soñ Qırımğa turlarnıñ satışı 20-30%-ge tüşti. Amma RTB añlattı ki, 2023 senesine köre ayırtmalar "pek arttı".
Aynı zamanda Pletençuk qayd etti ki, Uç Quyuda yaralanğanlar rusiye vatandaşları ediler.
"Ruslarnıñ yapqanları şu vaqiada yaralanğan raatlatıcılar aqqında laf etsek. Belli olğanı kibi, yaralanğanlar Qırımnıñ sakinleri degil ediler. Olar Rusiyede aytqanları kibi köçip keldiler", — dep qayd etti o.
Telegram ve Facebookta Suspilne Qırım haberlerine abune oluñız
