Bozarğan aynıñ 12. künü Hmelnıtskıy şeerinde Ukrainanıñ quşaq küreşi çempionatı "Alış" bitti. Qırım taqımı, birinci yer alğan üç sportçu tarafından çeşitli kategoriyalarda taqim etildi. İzet Bekirov ve Madamin Mirzoev, eki küreş çeşitinde altın almaq içün küreştiler: serbest üslüp ve klasik üslüp, ekisi de ğalip oldı. Ayşe Yağyayeva eki yaş kategoriyasında aynı anda performans etip, birinci ve ekinci yer aldı.
Qırım Muhtar Cumhuriyetiniñ Sport küreşi federatsiyasınıñ birinci vitse prezidenti İmran Useinov bu sport, yarışmalarnın nasıl keçkeni ve qırımtatar sportçularını añlattı.
O, küreşniñ klasik ve serbest üslüpleriniñ farqlılıqlarını añlattı.
"Klasik üslüp — ayaqlar ya da raqiplerniñ aqayları arasında areketler olmadan, vucutnen küreş üdlübidir. Serbest üslüpte ise ayaqlarnı qullanmaq mümkün. Yani dzüdoğa beñzey", — İmran Useinov qayd etti.
Federatsiyasnıñ vitse prezidenti qoştı ki, er bir kategoriyada İzet Bekirov ve Madamin Mirzoev eki kere küreştiler, bir künde er biri 8 kere küreşti.
O bildirdi ki, İzet Bekirov, Madamin Mirzoev ve Ayşe Yağyayeva resmiy yarışmalarda ilk kez iştirak ettiler ve altın qazandılar.
"Genç qızlar kategoriyasında iştirak etken Ayşe Yağyayeva birinci yer aldı. Bundan soñ, akem oña yetişken kategoriyada iştrak etmege teklif etti ve o, tunç medalını aldı", — İmran Useinov añlattı.
O hatırlattı ki, Ukrainanıñ kontrol etilgen topraqlarında faal etken Qırım MCniñ Sport küreşi federatsiyası 2020 senesi teşkil etildi.
"Bizim vazifemiz — vaqtınca işğal etilgen Qırımdan köçken sportçularğa baqıp yardım etmektir. Böylece, vaqtınca işğal etilgen Qırım MCde yaşağan sportçularğa karyerasını inkişaf ettirmege imkân yaratamız. Bizim böyle sportçularımız çoq!", — İmran Useinov qayd etti.
Onıñ sözlerine köre, şu anda Federatsiyada 15 çalışqan küreşçi bar, olarnıñ çoqusı Qırımlıdır.
"Herson vilâyetiniñ cenübinde yaşağan qırımtatarlar da bar. 16 yaşından büyük sportçular aqqında laf etemiz, çünki balalar da bar. Amma olarnıñ sayısını bilmegenim içün aytamam. Olarnı saymaq kerek, çünki er bir klubda tahminen 20 bala bar. Balalarnıñ sayısı er vaqıt deñişe", — qoştı o.
İmran Useinov qayd etti ki, Federatsiya küreşniñ bir qaç çeşitini taqdim ete.
"Olar arasında olimpiya küreşi, ananeviy quşaq küreşi. Bundan ğayrı, grepplingniñ vekilleri ve qız dzüdocımız bar. Küreşniñ er bir çeşitinen oğraşmaq içün bizim nizamnamemizniñ kenişlettik, çünki ukrain yarışmalarında iştirak etken sportçularımız er vaqıt başqa vilâyetlerniñ taqımlarına qatılıp, yarışmalarğa ketmege rica ete ediler. Şimdi ise biz, öz bölgemizni taqdim etemiz", — añlattı o.
Federatsiyanıñ vitse prezidenti ayttı ki, yarımada işğal etilmeden evel Ukrainanıñ kontrol etilgen topraqlarında çalışacaq Qırım Gençlik beden medeniyeti ve sport idaresini yañıdan açmaq içün şu anda aytışmalar keçe.
"Yarımada işğal etilmeden evel Qırımda bizim Gençlik ve sport nazirligimiz bar edi. Ukrainanıñ vilâyetlerinde, er bir vilâyet memuriyetinde Gençlik beden medeniyeti ve sport idaresi bar, yani bölgeniñ resmiy temsili bar. Em de bu idareniñ vazifesi — öz sportçularını köstermek, sport ustası ve ürmetli idmancı statusını bermek içün veiqalarnı yollamaq ve ilâhre. Bizim böyle idaremiz yoq. Bunıñ içün biz, yarım resmen çalışmağa ve böylece sportçularımızğa yardım etmege mecburmız", — İmran Useinov qoştı.
O qayd etti ki, er bir sportçuğa sport unvanı ve seviyesini bermek içün Federatsiya başqa vilâyet memuriyetlerinden bunı yapmalı. Bu da pek oñaytlı bir usul degil.
İmran Useinov añlattı ki, Federatsiyanıñ sportçuları Ukrainanıñ sport taqımınıñ azalarıdır.
"İrfan Mirzoev — er vaqıt yahşı netice köstergen yunan-roma küreşiniñ sportçusıdır. Şu anda o, Ukrainanıñ taqımınıñ birinci nomerası ve ülkemizde 77 kg kategoriyasında eñ yahşıı sportçudır. Er vaqıt yahşı neticelerni köstergen bir sportçudır. Er sene halqara, qıtaviy ve cian yarışmalarında Ukrainanıñ vekili ola: Aavropa çempionatı, Dünya çempionatı", — ayttı o.
Federatsiyanıñ vitse prezidenti başqa sportçular, muvafaqiyetleri ve kelecek planlarını añlattı.
"Greppling üslübinde Süleyman Mamutov ve İvan Şkrabiy kibi sportçularımız bar. Keçenlerde mayıs ayında Avropa çempionatına ketip, medallarnı qazandılar. Süleyman Mamutov Avropa çempionı oldı, İvan Şkrabiy ise Avropa çempionatınıñ mukâfatçısı oldı. Söz sırası, Süleyman rus küreşçisini yeñdi, bu yahşı bir köstergiçtir. Şimdi ise Ukrainanıñ quşaq küreşi çempionatında bizim oğlanlarımız, Qazahistanda olacaq dünya yarışmalarına yaqınlaştılar. Anda da ülkemizni taqdim etecekler", — İmran Useinov qoştı.
Telegram ve Facebookta Suspilne Qırım haberlerine abune oluñız
