9 senege maküm etilgen Sudaqlı arap tilşınası, qırımtatar İsmet İbrahimovnıñ tişlerini tedaviyletmek kerek. Bundan ğayrı, onıñ midesi ağıra.
Siyasiy mabüsniñ apayı Raziye Mustafayeva “Qırım birdemligi” cemaat teşebbüsine bu aqqında haber berdi.
İbrahimovnıñ sözlerine köre, keçenlerde tişçi ketmeli.
Keçken afta balalarınen beraber o, Rusiyeniñ Ulyanovsk vilâyetindeki Dimitrvğrad apishanesinde aqayını ziyaret etti. Bu, dört senelik apis devrinde ilk körüşüvi edi. 11 yaşındaki Hafsa, 9 yaşındaki Asilâ ve 6 yaşındaki Beyhan bir qaç sene evel babasını soñ kere kördiler.
"Em balalar, em de babası içün pek zor edi", — Mustafaeva qayd etti.
Bundan ğayrı, SİZOda tevqif müddeti yañıdan sayılğanı sebebinden apishanede qırımtatar adamı beş yerine eki sene olacaq. Müddetiniñ qalğanını müstemlekede keçirecek.
İsmet İbrahimov aqqında ne bilemiz
İsmet İbrahimov — Sudaqlı qırımtatar adamı, arap tilini bilgen, üç qıznıñ babasıdır. Apis etilmeden evel baqqanı qart ana-babası bar.
2020 senesi oraq ayınıñ 7-sinde Qırımnıñ farqlı rayonlarında bir qaç ev tintilgen soñ FSB işçileri qırım musulmanlarını tuttılar, olar arasında da İsmet ibrahimov edi. Bundan soñ faalcini Aqmescitteki müstemlekede qapattılar, birazdan Rostov-na-Donudaki 1. SİZOğa etap ettiler.
İbrahimovnı 2003 senesinden Rusiyede yasaqlanğan "Hizb ut-Tahrir"niñ faaliyetini teşkil etmege qabaatladılar. "Memorial" uquq qorçalayıcı merkezi, qırımtatar adamını siyasiy mabüs olaraq tanıdı.
2022 senesi oraq ayında işğalli makeme İbrahimovnı 19 senege maküm etti, olardan birinci 5 senesini apishanede keçirmeli. Azat etilecek soñ 2 sene devamında ketmege sıñırlanğan olacaq.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram ve Facebookta Suspilne Qırım haberlerine abune oluñız
