Mayıs ayınıñ 18. künü, qırımtatar halqınıñ sürgünliginiñ 80. seneliginden evel şura cinayetiniñ fedalarınıürmetnen añmağa yönelgen tedbir oldı. Kıyivdeki Tış işleri nazirliginiñ binası ögünde qara şeritnen qırımtatar halqınıñ bayrağı köterilip tüşürildi.
Resmiy Facebook saifesinde Ukraina prezidentiniñ QMCdeki Temsili bu aqqında haber berdi.
Qırımtatar halqınıñ bayrağını köterüv merasiminde Ukraina prezidentiniñ QMCdeki daimiy temsili Tamila Taşeva, Ukraina tış işleri naziri Dmıtro Kuleba, Qırımtatar Milliy Meclisiniñ başı refat Çubarov ve qırımtatar halqınıñ lideri Mustafa Cemilev iştirak ettiler.
"Bu merasimni Qırımda yapa bilgencek, qırımtatar bayrağını köterip turacaqmız", — dep Dmıtro Kuleba bildirdi.
Qırımtatar halqınıñ lideri Mustafa Cemilev, şura akimiyetiniñ 1944 senesi yapqanı cinayetniñ qırımtatar halqı içün neticelerini hatırlattı.
Qırımtatar Milliy Meclisiniñ başı Refat Çubarov, qırımtatar halqınıñ aqlarını qorçalav yolunda Ukrainanıñ qaysı adımlarnı yapqanını añlattı ve bunıñ şura akimiyetiniñ 1944 senesi yapqanı genotsidniñ neticelerini kelecekte yoq etmege ümüt bergenini qoştı.
Genotsid fedalarını ürmetnen añuv çerçivesinde qırımtatar bayrağını tüşürüv merasimi de oldı.
Ukraina prezidentiniñ QMCdeki daimiy temsili qayd etti ki, Rusiyeniñ yapqanı cinayetler terkararlanalar, çünki Şura Birliginiñ yapqanı cinayet içün rusiye devleti afu soramadı ve mesüliyet çekmedi.
"Bunıñ içün bugün qırımtatarlarnıñ gibrid sürgünligi adlandırğanları vaqia ola. Böylece, şimdi yük vagonlarına mindirmeyler, amma qırımtatarlarnı Qırımdan ketmege mecbur etken şaraitni yaratalar. 2014 senesi rus askerleri Qırımnı işğal etkenleri sebebinden, 2022 senesi duşman ordusına zoraki askerlikke kütleviy çağıruv sebebinden", — dep Tamila Taşeva añlattı.
O qayd etti ki, 1944 senesi sürgünlik cinayeti ürmetli şekilde tanınmalı.
Tamila Taşeva, qırımtatar halqınıñ sürgünligini genotsid aktı tanığan Ukraina Yuqarı Şurasına ve Şura Birliginiñ akimiyetiniñ qırımtatarlarğa qarşı bu cinayetini tanığan Kanada, Latiya ve Litvaniya ükümetlerine teşekkür bildirdi.
"Daimiy temsil, er bir şekilde qırımtatar halqınıñ genotsid fedalarını ürmetnen añmağa çağırdı: qara şeritni bağlamağa, tanışqanları qırımtatarlarğa taziye bildirmege, "Serbest Qırımğa mektüpler" teşebbüsi çerçivesinde Rusiyede qanunsız olaraq apis etilgen qırımtatarlarğa mektüp yazmağa", — dep prezidentniñ QMCdeki Temsili bildirdi.
Telegram ve Facebookta Suspilne Qırım haberlerine abune oluñız
