İşğal etilgen Aqmescitteki Dünya makemesi, Telegram kanalında "KEMska volost" oquğan studentlerniñ arbiy komissarlıqqa qanunsız çağıruvları aqqında port sebebinden advokat Emil Kurbedinovğa 30 biñ ruble13 biñ grivna cezasını berdi.
Kurbedinov "Qırım birdemligi"ne bu aqqında haber berdi.
Qayd etildi ki, işğalli makeme uquq qorçalayıcını "arbiy komissarlıqnıñ işi aqqında sahte malümat" paylaşmaqta qabaatlı tanıdı ve sanki aqiqiy şekilde sahte müim malümatnı añlı tarzda paylaşuv maddesine (RF MBQniñ 13.15. maddesiniñ 9. qısmı) köre eñ kiçik para cezasını berdi.
Üküm çıqarmadan evel böyle degen "makeme", qırımtatarlarnıñ başqa davalarınen bağlı araştırma yapqan mütehassıs tarafından yapılğan ekspertizanı ögrendi. İmaye etici taraf qayd etti ki, bu mütehassısqa ve onıñ araştırmasınıñ obyektivligine inanmay. Amma makeme, bu araştırmanı baqıp onı tanıdı.
İşğal etilgen uquq qorçalayıcı organlarnıñ mütehassısları netice çıqardılar ki, Emil Kurbedinovnıñ postundaki hızmetten azat etilgen studentlerniñ aqlarınıñ bozulması aqqında malümat "halq içün müim malümattır ve aqiqiy malümat kibi bildirildi". Bundan ğayrı, mütehassıs, Kurbedinovnıñ şahsiy Telegram kanalını "sıñırlanmağan sayıda qullanıcılar içün irişilir bir yer" adlandırdı ve "qullanıcınıñ bu saifedeki postu halq ögünde posttır".
"Üç ay devamında dava baqılğanda qorçalayıcı taraf, Rusiyedeki arbiy komissarlıqlarnıñ bozmaları aqqında pek çoq delilni taptı. Amma men, öz qabaatsızlığımnı delil etemem. AQMAşırıcılıqqa qarşı merkezniñ işçileri bunı delil etmeli ediler. Olar iç bir şey köstermediler, makemecige tek bunı (delillerni — muar.) qaldırdılar. Bu makeme oturışında AQMniñ işçisi gizlenmeyip, "Biz endi [qanun bozması aqqında protokol] tizdik, makeme ise delillerni qıdırsın, taqiq etsin, sebeplerini ögrensin", dep ayttı. <…> Ne içün (meni qabaatlı tanığanını — muar.) bunı yapqanını bilem. Bu, Qırımda adokatlarğa devam etilgen tesirdir", — dep Emil Kurbedinov bildirdi.
Hatırlatamız ki, bu sene kiçik aynıñ 15. künü işğal etilgen Qırımda olğan şeylerni añlatqan Telegram kanalında postu sebebinden qırımtatar advokatı Emil Kurbedinovnı tuttılar ve "E" Merkezine alıp ketirdiler.
"Hızmetten vaqtınca azat etilgen talebelerge arbiy komissarlıqqa çağıruvname yollaylar. Bundan soñ bazı zamanlarda oğlanlar diplomını da almağa yetişmeyler, çünki olarnı orduğa askerlikke kütleviy çağıralar", — dep 2023 senesi oraq ayınıñ 14. künü postunda bildirildi.
Emil Kurbedinov aqqında ne bilemiz
Emil Kurbedinov — ukrain ve rus uquq qorçalayıcısı, siyasiy davalarnen çalışqan baş qırım advokatlarından biri, çoq qırımtatar siyasiy mabüsiniñ imayecisi ve Front Line Defenders (2017) Halqara uquq qorçalayıcı mukâfatınıñ laureatıdır.
2017 senesi Bağçasarayğa ketkende ilk kere memuriy tevqif etildi. Şeer yanında "RF İİNniñ Aqşırıcılıqqa qarşı merkezi"niñ ("E" Merkezi) işçileri qorçalayıcını tuttılar. Bundan sñ Aqmescitke aşıp ketirdiler ve ofisini tinttiler. Birazdan Ukrainada yasaq etilgen "VKontakte" içtimaiy ağında 2013 senesi "Hizb ut-Tahrir" konferentsiyası aqqında "aşırıcı" postlar sebebinden onı 10 künge maküm ettiler.
2018 senesi Kurbedinov evden ofiske ketkende “E“ Merkeziniñ işçileri onı tuttılar ve RF Memuriy bozmalaq qanunnamesiniñ 20.3. maddesini (natsizm, aşırıcı ve başqa yasaqlanğan timsallerni teşviqat etüv ve kösterüv) bozmağa qabaatladılar.
2024 senesi kiçik aynıñ 15. künü işğal etilgen Qırımnıñ Aqmescit şeerindeki RF FSBniñ işğalli idaresiniñ binası ögünde "Aşırıcılıqqa qarşı merkez"niñ işçileri Kurbedinovnı tuttılar. Bunıñ sebebi, 2023 senesi oraq ayınıñ 14. künü Telegramda yazğanı tefsir oldı. İşğalciler bildirdiler ki, böyle tefsirnen advokat sanki añlı tarzda sahte, halq içün müim malümatnen paylaştı. 116 abunecinen "KEMska volost" kanalındaki post aqqında laf etemiz.
RF MBQniñ 13.15. maddesiniñ 9. qısmına (Kütleviy malümat azatlığı suistimalı) köre oña qarşı memuriy dava açıldı. "Qrımskiy SMERŞ" Telegram kanalınıñ idarecilerinden biriniñ arizası, bunıñ sebebi oldı. Advokat ta rus taraflı kanalğa ariza yazıp yolladı.
Ukraina prezidentiniñ Qırım MCdeki Temsili, qırım advokatınıñ qanunsız tutulmasını takbih etti.
ARTICLE 19 halqara uquq qorçalayıcı teşkilâtı Kurbedinovnen birdemligini bildirdi.
Telegram ve Facebookta Suspilne Qırım haberlerine abune oluñız
