Mayıs ayında Qırımda meyva bağçaları suvundı ve meyva bermedi. İşğalciler bildirdiler ki, bereket meselelerinden biri - meyvalar içün uyğun olmağan rayon saylandı. Keçenlerde de bereketsizliq qayd etile edi.
Yerli fermacı Suspilne Qırımğa bu aqqında haber berdi.
"Tahminen 2018-2019 ss. meyva bereketinen meseleler peyda olmağa başlandı, o zaman “Titan” zavodı kirlengen ava işlep çıqardı. Bunıñ bağlı olıp-olmağanını bilmeyim, amma o zamandan berli ayrıca orta Qırımda terek bereketi azladı. Bunıñ neticesinde yaz mevsiminde bazarlarımızda meyva paalı, olarnıñ keyfiyeti ise daa yaramay oldı”, - dep añlattı.
Bundan ğayrı, fermacı keç bereketnen bağlı meselelerini añlattı.
"Şimdi bizde terekler pek yaray çiçekleşe, bazıları qurumağa başladı. Birinciden bu, oraq ayınıñ ortasında meyva berecek olğan kiraz ve qaysı terekleri. Mayıs ayında ava pek deñişkende bu meyvalarnen meselelerimiz bar", — dep qoştı.
Bundan ğayrı, işğalli mütehassıslarnıñ bilgilerine esaslanaraq, teşviqiy RIA “Novosti Qrım” bu sene bereketnen meseleler aqqında da haber berdi.
Mayıs ayı içün Qırımdaki suvuq avanı tefsir etkende Vernadakıy adına işğal etilgen Qırım federal universitetiniñ meyva-sebzecilik ve bağcılıq bölüginiñ dotsenti Dmıtro Potanin bildirdi ki, Qırımnıñ bazı rayonlarında tamam suvuq ava sebebinden meyva, yemiş bağçaları ve bağlar qurudı. O qayd etti ki, Qarasuvbazar rayonındaki alma terekleri çoq zarar kördi, çünki anda kelecek bereket tamamınen yoq oldı. “Alim” bildirdi ki, “400 tonnağa” qadar bereket olur edi.
Ayrıca Dmıtro Poranin qayd etti ki, meyvalar içün yer saylanğanda hata yapıldı.
"Hata yaparaq ya da uyğun olmağan topraq saylanğanı bağçalar rayonlarında bereketniñ yoq olmaq telükesi daa yüksektir. Ava ne agronomlar, ne agrohızmetten bağlı ola, amma uyğun topraq saylansa edi, bu suvuqlar neticesindeki ğayıplar azlaştırmaq mümkün olur edi”, - dep añlattı.
Dmıtro Potanin qoştı ki, Bağçasaray rayonınıñ aşağı ve dağlardan ögündeki topraqlarında bereket zarar kördi, çünki anda ava pek suvuq edi.
Teşviqiy RİA “Novosti Qrım”nıñ bilgilerinde işğal etilgen Qırım köy hocalığınıñ araştırma-ilmiy institutınıñ müdiri Volodımır Paştetskıy bildirdi ki, suvuq ava ve suv kemligine azırlanmaq mümkün degil, olarnı “tek yaşamaq” mümkün.
"Qırım — köy hocalığı içün pek telükelibir zonadır. Bölgeniñ tarihında mayıs ayınıñ 17. künü ava -7 derecege tüşti. Bu sene derece daa yüksek edi”, - dep qayd etti.
Volodımır Paştetskıy haber berdi ki, agrarcılar suv kemliginen yüzleştiler. Onıñ sözlerine köre, bir ay evel yağmur yağacaq edi. O añlattı ki, tamam işğal etilgen Qırımda pek az yağmur yağa.
“Alim” tarafından qayd etilgen meseleler sebebinden bu sene işğal etilgen Qırımda bol ububat bereketini beklenmemeli.
O qoştı ki, keçken sene kiçik ayda 100 mm, saban ayında 80 mm, çiçek ayında ise 60 mm yağmur yağdı.
“Bu sene qara qış ayından saban ayına qadar umumen 42 mm, kiçik ayda 15-16mm yağmur yağdı. Çiçek ayında ise 4 mm yağmur yağdı, bu da keçken seneniñ köstergicinden daa azdır. Bu sene bol bereket olmaz”, - dep Volodımır Paştetskıy añlattı.
Telegram ve Facebookta Suspilne Qırım haberlerine abune oluñız
