İşğal etilgen Qırımda işğalciler muqavemet areketine daa çoq tesir etmege başladılar. Ukraina prezidentiniñ Qırım MCdeki temsili, soñ zamanlarda daa yedi insan tutuldı, dep qayd etti. Aynı zamanda işğalge muqavemet areketeri faaliyet yapmağa devam eteler, şu cümleden, "Sarı şerit" faalcileri Qırım dağlarına daa bir kere ukrain bayrağını köterip qoydılar.
Facebookta Ukraina prezidentiniñ Qırım MCdeki temsili bu aqqında haber berdi.
Qırımnıñ sakinleriniñ muqavemeti
İdris Süleymanov Rusiyeniñ Ukrainağa qarşı cenkni takbih ete, rus işğal ordusını "faşist" adlandıra ve Ukrainanı destek ete edi. Bu sebeplerden işğalcler onı tuttılar, "dava"nıñ bilgilerini ise işğal makemesine yolladılar. Adamnı kamera ögünde öz nazar noqtası içün afu soramağa mecbur ettiler.
İçtimay ağlarda Kefeli Derbenev Yuriy cenkke qarşı olğanını bildire, RF ve rus diktatorı Putinnin areketlerini takbih ete edi. "Aşırıcılıqqa qarşılıq merkezi" adamnı tuttı ve bilgilerini "makeme"ge yollafı, adamnı kamera ögünde öz nazar noqtası içün de afu soramağa mecbur ettiler
Rus işğalcileri Canköyli Koçetkova Tetâna ve daa üç insannı tevqif ettiler ve endi bilgilerini "makeme"ge yolladılar. Ruslar bildirdiler ki, çiçek ayınıñ 17-sinde Canköydeki uçaq limanına ateşniñ videosını çıqarıp yayınlağan beş insannıñ şahıslarını ögrendiler.
2022 senesi arman ayında öz içtimaiy ağlarında "rus Qırımı oña kerekmey" dep bildirgen ve Ukrainağa qaytmağa istegen Aqyarlı Barbakar Kristina da işğalciler tarafından tutuldı.
Ukrain Telegram kanallarında ruslarnıñ areketlerini takbih etkeni sebebinden ve Qırımnıñ azat etilmesini beklegen Kudrâvtseva Katerına tutuldı. "Dava"nıñ bilgileri "makeme"ge yollandı. Qadınnı kamera ögünde afu soramağa mecbur ettiler.
Qırımnıñ işağline muqavemet areketi
"Sarı şerit" areketiniñ faalcileri Qırım dağlarına daa bir ukrain bayrağını köterdiler.
"Biz muqavemet köstermege devam etecekmiz, Ukrainanıñ ğalebesini yaqınalştırmaq içün ellerimizden kelgen er şey yapacaqmız, çünki Qırım — Ukrainadır!", — dep bildirildi.
Bundan ğayrı, işğal etilgen şeerlerde "Sarı şerit" teşviqat malümatınen kâğıtlarnı yoq ete, öz gizli malümatnı basa ve vatanperver timsallerini tarqata.
Vatanperverli levhalar ve sarı şeritler endi Aqmescit, Yalta, Aluşta, Aqyar, Kezlev ve işğal etilgen yarımadanın başqa şeerleirinde peyda oldı.
İşğal etilgen Qırımda "Qırım cesür çağalaları" faalcileri duşmannen işdeşlik yapqanlar ve RF SQden cenk cinayetçileriniñ şahsiy bilgilerini ögrenip yayınlamağa devam eteler.
"Açuvlı Mavka" qadın muqavemet areketi öz aftalıqnı tarqatıp, işğalcilerniñ cinaytelerini tafsilâtlıca añlatmağa devam ete.
"Ateş" arbiy-partizan areketiniñ agentleri büyük istihbarat operatsiyalarını keçireler, Aqyar ve Keriç şeerlerindeki rus yermay bazaları ve başqa arbiy obyektleriniñ yerlerini qayd eteler. Faalciler haber berdiler ki, Ukrainağa halqara yardımnıñ arttığı haberini alğan soñ işğal etilgen yarımadada ruslar daa çoq mudafaa inşaatını qurmağa başladılar.
Ukrain taraflı Qırımnıñ sakinleriniñ taqipleri aqqında ne bilemiz
"RF SQni itibardan tüşürüv" maddesine binaen Qırım "makeme"lerindeki yañı qanunsız memuriy davalar işğalge muqavemetniñ quvetlengenini köstereler. Endi 780 "dava" qayd etildi. 680 dava çerçivesinde memuriy para cezası berildi ya da başqa maddege binaen diger davanen birleştirilip umumiy üküm çıqarıldı. 24 dava çerçivesinde makeme ceryanı devam ete.
Telegram ve Facebookta Suspilne Qırım haberlerine abune oluñız
