Skrıpnık Viyenada Qırım uquq qorçalayıcı gruppası, dünyadda demokritayanı qorumağa yardım etkeni içün Democracy Defender Award ("Demokratiya quruvı") mukâfatını aldı. 1996 senesi OSCEniñ azası olğan 8 ülke (AŞQŞ, Kanada, Qaradağ, Danimarka, Büyük Britaniya, İsveçiya, İsviçre ve Felemenk) tarafından bu mukâfat teşkil etildi.
Çiçek ayınıñ 19-ında Facebookta QUQGnıñ idaresiniñ başı Olha Skrıpnık mukâfat alğanı aqqında haber berdi.
Elçiler ögündeki söz aytmadan evel Ukrainada ölgen askerler ve vatandaşlarnı ürmetnen añmaq içün ürmet daqqasınen başlattı.
«Democracy Defender Award – tek Qırım uquq qorçalayıcı gruppasınıñ işiniñ tanınması degil, bütün Ukrainanıñ uquq qorçalayıcı areketiniñ, Ukrainağa ve rusiye tarafından işğal etilgen topraqlar, Qırımda demokratiyağa sadıq qalğanlarnıñ, adaletni qaytarmaq içün cenkleşkenlerniñ müimliginiñ tanınmasıdır. Tamam bunıñ içün ruslar olarnı öldüreler, azaplaylay, apis eteler», — dep uquq qorçalayıcı qayd etti.
OSCE, resmiy saytında qayd etkeni kibi, halqara uquq nizama esaslanğan adaletli, telükesiz ve demokratik dünyanı yaratmağa yardım etken cemaat erbapları ve uquq qorçalayıcı teşkilâtlarğa Democracy Defender Award mukâfatını bere.
«Ukrainada demokratik deñişmelerni qoruğan çoq işdeşim, uquq qorçalayıcılar, jurnalistler, faalciler bugün Ukrain ordusındalardır, çünki insanlarnıñ ayatlarını imaye etmek, insan aqları ve demokratik dünyanı qorumaq içün başqa yolumız qalmadı. Olarnıñ çoqusı cenkleşkende öldi», — dep Skrıpnık qoştı.
O, Ukrainanıñ Rusiyenen farqlığını qayd etti. Rus askerlrei balalarnı öldürmege keldiler, ukrain askerleri ise ayatını telükege oğrataraq, olarnı qorçalaylar.
Uquq qorçalayıcı tedbirniñ iştirakçilerine hatırlattı ki, tek çiçek ayınıñ 19-ında Rusiye Dnipropetrovsk vilâyetinde üç balanı öldürdi.
«Eger Ukraina bu cenkte ğalebe qazanmasa, demokratik dünya yoq olur. Demokratiya - berilgen bir şey degil, öz başına mevcut olmay. Demokratiya içün cenkleşmek kerek», — dep Skrıpnık çağırdı.
O qayd etti ki, işğal etilgen ukrain toprağınıñ er bir kilometri Putinniñ ordusını başqa demokratik ülkelerge yaqılaştıra, bunıñ içün Ukrainanıñ ğarbiy ortaqlarınıñ yardımına ihtiyacı bar.
«Bugün epimizniñ demokratiyanı qorumaq, insan ayatı ve itibarına esaslanaraq qurulğan dünyanı saqlamaq imkânımız bar. Şimdi bunı yapmasaq, tek Rusiye degil, totalitar devletleri ve terror rejimleriniñ birleşmesi de demokratik ülkelerni yoq eter», — dep Skrıpnık hulâsa çıqardı.
Telegram, Viber ve Facebookta Suspilne Qırım haberlerine abune oluñız
