İşğalciler tarafından 12 senege qanunsız olaraq maküm etilgen siyasiy mabüs Tofik Abdulgaziev Çelâbinskteki apishane hastahanesiniñ reanimatsiyasından şiddetli terapiya palatasına keçirildi.
Siyasiy mabüsniñ apayı, "Qırım birdemligi"ne bu aqqında haber berdi.
Bildirildi ki, ailesi Abdulgazievni ziyaret etmege becerdi. Tofikniñ apayı Aliye Qurtametovanıñ sözlerine köre, o zornen adım yapa ve yorulan körüne. Bazı da onıñ lafı añlaşılmaz. Apishanede deyerli 40 kilogramğa azladı.
"Körgenim aqayımnıñ alı meni şaşırıp qaldırdı. Apis etilmeden evel sağ-sağlam, pozitiv olğan, er vaqıt külümsiregen ve yaqışıqlı aqayım Tofik ve şimdi menim ögümde oturğan yorulğan, zayıflanğan insan. Ne körünüşi, ne de areketleri ceetinde bir-birine beñzemegen eki insan kibi", — dep Aliye Qurtametıva añlattı.
O qoştı ki, aqayı közlerini qısaraq, aile azalarınıñ yüzlerine diqqatnen baqaraq, ögünde kimlerniñ olğanlarını ögrenmege tırışqan kibi edi. Bazı da "tanışmağanı insanlar" kibi yaqınlarğa baqa edi.
Tofik Abdulgaziev aqqında ne bilemiz
2017 senesi mayıs ayınıñ 4-ünde Tofikniñ evi ilk kere tintildi. O zaman tutulmadı. 2019 senesi saban ayınıñ 27-sinde evi ekinci kere tintilgen soñ Abdulgaziev, Rusiyede yasaqlanğan "Hizb ut-Tahrir" teşkilâtına ait olmağa qabaatlanıp tevqif etildi.
2022 senesi mayıs ayında Rostov-na-Donudaki Cenübiy bölge arbiy makemesi, Tofik Abdugazievğa üküm çıqarıp, sert rejimli müstemlekede 12 senege maküm etti. Müddetniñ ilk beş senesini apishanede keçirmeli.
Bir yoldan soñ 2023 senesi mayıs ayında Vlasıstaki Apellâtsiya makemesi, qorçalayıcı tarafnıñ ükümge şikâyetnamesini baqtı ve ükümini deñiştirmeyip qaldırdı. 2023 senesi oraq ayında Abdulgaziev, RFnıñ Çelâbinsk vilâyetiniñ Verhnöuralsktaki apishanege etap etildi.
Tevqif etilmeden evel Tofik Abdulgaziev, qırım siyasiy mabüslerniñ balaları içün tedbirlerini teşkil etmege yardım etken edi. "Qırım birdemligi" cemaat birleşmesiniñ faalcisi, ses operatorı, "Qırım balalığı" leyhasınıñ iştirakçisi ed. Bundan ğayrı, siyasiy mabüslerge SİZOğa aşayt mahsulatını yollağan, siyasiy sebeplerden açılan davalarnıñ oturışlarını ziyaret etken, vatandaşlarnıñ evileri tintilgende olarnı destek etmege kelgen edi.
Telegram ve Facebookta Suspilne Qırım haberlerine abune oluñız
