13 senege maküm etilgen siyasiy mabüs Server Zekiryayev, Rusiyeniñ Tulsk vilâyetindeki 1. müstemlekeniñ azaplayıcı şartlarını añlattı.
Zekiryayevniñ apayı Zarema "Qırım birdemligi"ne bu aqqında haber berdi.
Bildirildi ki, 2022 senesi berim ayında Novoçerkasktaki SİZOdan etap olunğan soñ şu vaqıtqa qadar bulunğanı ŞİZO, SİZP ve PKTKamera türlü binade onı er vaqıt qapatalar. "Köpek valsı"nıñ refaqatınen onıñ kamerasını sıq tinteler. Aqrabalarına advokatnı çağırmağa yazğanı mektüplerni yollamaylar.
Serverniñ sözlerine köre, ŞİZOğa yollağanınıñ sebebini, SUUSert tutuv şartları ve PKTge yollağanınıñki kibi, resmen asla bildirmediler. Kanalizatsiyadan amiak ve karbondioksit qoqusı olğan PKTde onı tutalar. Zekeryayevniñ nefes ve hronik yürek-qan damarı kemliginen meseleleri qıyınlaştı.
"Tahminen sekiz ay devamında hamamnıñ ava borusınen bağlanğanı kamerada qırımtatar adamını tuta ediler. Aftada eki kere apis etilgen insanlarnı yuvlamağ yollaylar. Bu sebebinden aftada eki kere saba saat 5ten aqşam saat 16ğa qadar kamerada soñ derecede yüksek dımlılıq ve gigyena eşyalarınıñ küçlü qoqusı peyda ola. Zekeryayev buña video qayd eticisinen teftişçilerge şikâyet etti, amma arizalar defterine şilâyetlerni yazıp qoymadılar", — dep bildirildi.
Bu sebebinden siyasiy mabüsniñ sağlıq meseleleri qıyınlaştı. Server aşağın ve idman etken soñ köpüknen qusmağa, boğazda accılıq, muntazam başı aylanmağa şikâyet etti. Rus müstemlekesiniñ memuriyeti buña iç bir şey yapmay. Qırımtatar adamını PKTden etap etmege de çoq kere red ettiler. İşçiler bir kere añlattılar ki, "yaşayış tarzı" sebebinden onı o yerge yolladılar ve oña er vaqıt terrorcı deyler.
Bir senedir apishaneniñ reberligi, onıñ mektüplerini aqrabalarına yollamay. Anda Server ailesini advokat çağırmağa rica etti. Aqayınen ne olğanını bilmegenini yazğan apayınıñ mektüplerini alğan soñ Server bunı ögrendi. Siyasiy mabüsniñ apayınıñ sözlerine köre, aqayınıñ mektüpleri kelse de, advokat ricaları sızılıp taşlandı. Nezaretçiler de advokat ve insan aqları ombudsmanınen bağlanmağa çoq kere oña red ettiler.
Başqa şikâyetleri de bar: matbuatqa abune olmağa imkânsızlığı, müstemlekeniñ hadimleriniñ körüşüv yasağı (2023 senesi berim ayında ailesinen ilk sefer körüşken berli Server ailesini körmedi), devletniñ almalı olğanı apishane urbası içün esabatından şahsiy parasını aluv. Bundan ğayrı, o etap olunğan soñ Qurannen diniy kitaplarını alıp çıqardılar, onı ŞİZOğa yollağan soñ ise 18 biñ rublege (7,6 biñ grn) posılkanı alıp çıqardılar. Episi bu, aş, şahsiy eşalarını oña bermediler, oña tek boş yol çantasını berdiler. Ailesinin fotoresimini altı aydan soñ berdiler.
Bundan ğayrı, Serverge etap olunğan üç ay soñ çalışqanı tikiş tsehindeki işke qaytmağa izin bermediler. Bunıñ sebebini bildirmediler.
Server Zekiryayev aqqında ne bilemiz
- 2017 senesi ekim ayınıñ 11-inde Bağçasarayda FSB işçileri altı qırımtatar adamını tuttılar: Server Zekiryayev, Tımur İbrahimov, Marlen (Süleyman) Asanov, Memet Belâl, Seyran Saliyev ve Ernes Ametov.
- 2018 senesi mayıs ayınıñ 21-inde bu cinaiy dava çerççivesinde Edem Smayilov ve Server Mustafayev tevqif etildi. Er kes Rusiyede terrorcı bir teşkilât olaraq tanınğan, amma dünyanıñ ülkeleriniñ çoqusında ve Ukrainada serbest şekilde faal etken Hizb ut-Tahrir islâm siyasiy fırqasınıñ faaliyetine ait olmaqta şübelendi.
- 2020 senesi berim ayınıñ 16-sında Rostov-na-Donudaki Cenübiy bölge arbiy makemesinde "Hizb ut-Tahrir davası"nıñ ekinci Bağçasaray gruppasını üküm ettiler. Qırımtatarlarnı 13-19 senege maküm ettiler.
Hizb ut-Tahrir islâm fırqası sadece Rusiyede terrorcı bir teşkilât olaraq tanındı, çünki bu teşkilâtnıñ azaları, musulmanlarğa repressiyalar sebebinden muntazam tarzda işğal akimiyetini tenqit ete ediler. Aynı zamanda Hiz ut-Tahrir dünyanıñ ülkeleriniñ çoqusında ve Ukrainada serbest şekilde faal ete.
Telegram, Viber ve Facebookta Suspilne Qırım haberlerine abune oluñız
