İşğal etilgen Qırımda bücetçilerni, saban ayınıñ 15-17. künleri Ukrainanıñ vaqtınca işğal etilgen topraqlarında qanunsız olaraq keçirilecek Rusiye prezidentiniñ sahte saylavlarına ketmege mecbur eteler. Qırımnıñ sakinleri rey bermege istemegenleri sebebinden böylece ruslar, insanlarnı rey bermege mecbur eteler.
Tasil saasında çalışqan insan Suspilne Qırımğa bunı añlattı.
"İşten mesele olmaması içün epimizge, ketmek ve rey bermek kerekligimiz aqqında haber berdiler. Rey berecek soñ oquv yurtumızdaki kuratorğa telefon etip, rey bergenimizni aytmaq kerekmiz. Tamam bir insanğa rey bermek kerekligimizni aytmaylar. Esası, saylavlarğa ketip rey bermektir, çünki insanlar saylavlarğa ketmege istemeyler", — dep haber berdi o.
Öz Telegram kanalında "Sarı şerit" cemaat qarşılıq areketiniñ faalcileri, saylavlarğa az insannıñ ketmesini qayd ettiler.
"Sabadan berli Aqmescit ve Aqyar şeerlerinde r**istlerniñ saylavlarına pek az insan kete", — dep bildirildi.
Saat 09:00da işğal etilgen Qırım ve Aqyarda RF prezidentiniñ sahte ssaylavlarında rey bermek içün "rey bölükleri" açıldı. Olar saban ayınıñ 15-17. künleri çalışacaq. Bundan ğayrı, işğal saylavlarında "Gosuslugi" ("Devlet hızmetleri" - terciman) online şekilde rey bermek mümkün.
"Sarı şerit"niñ faalcileri Google Mapsta VİETda Ukraina vatandaşlarınıñ uzata qalmaq kerekligi "rey bölükleri"niñ yerlerini yayınladılar.
Ukraina TİN, işğal etilgen topraqlarnıñ sakinlerini qanunsız RF prezidenti saylavlarında iştirak etmemeğe çağıra.
"Ukraina Tış işleri nazirligi qayd ete ki, Ukrainanın vaqtınca işğal etilgen topraqlarında (Qırım Muhtar Cumhuriyeti ve Aqyar şeerinde, Ukrainanıñ Donetsk, Luhansk, Zaporijjâ ve Herson vilâyetlerinde) Rusiye Federatsiyasınıñ prezidenti "saylavları"nı keçirmek – qanunsızsır ve bunıñ uquqiy neticesi olmaycaq", — dep bildirildi.
Telegram ve Facebookta Suspilne Qırım haberlerine abune oluñız
