13 ve 18 senege maküm etilgen ve RF Çelâbinsk vilâyetiniñ Verhnöuralsk şeerindeki apishanede qırımtatar Ruslan Nagayev ve Şaban Umerovğa er vaqıt domuz etini bereler. İslâmda onı aşamaq yasaqtır.
“Qırım birdemligi”ne tefsir etkende siyasiy mabüslerni ziyaret etken advokatlarğa atıf eterek olarnıñ apayları Zarema Umerova ve Zarema Nagayeva bunı añlattı.
“Olarnıñ aşı balanslı degil. Aşta sıq domuz eti bar. Musulman olaraq Ruslan onı aşamay”, - dep Nagayeva qayd etti.
O qoştı ki, siyasiy mabüsniñ sağlığı alı zayıflaşqanı içün cerrahtan mesleat almağa ihtiyacı bar. Oña mesleat bermege ve diagnoz qoymağa red eteler, amma ilâçlarnı berdiler.
Aynı zamanda Umerovnı etap etken soñ ŞİZOğa oturttılar, çünki sanki “yañlış vaqıtta” yuqlap qalğan. Adamnıñ sağlığınen meseleler bar - yüksek basımını çeke. Bu sebibinden muntazam tarzda ilâç almalı.
Ruslan Nagayev ve Şaban Umerov aqqında ne bilemiz
Aluştadan iş adamı Ruslan Nagayev, “Hizb ut-Tahrir davası”nda Aluşta gruppasınıñ iştirakçisidir. Tintüerden soñ RFda terrorcı olaraq tanınğan (amma ülkelerniñ çoqusında, Ukrainada da, serbest areket etken) islâm siyasiy fırqası Hizb ut-Tahrirde iştirak etmekte qabaatlap onı ve daa dört qırımtatar adamını tuttılar.
Şaban Umerov, “Hizb ut-Tahrir davası”nda ekinci Aqmescit gruppasınıñ iştirakçisidir. Kütleviy tintüvlerden soñ 2019 senesi saban ayınıñ 27-sinde onı tuttılar. Onı da Hizb ut-Tahrirde iştirak etmekte qabaatlaylar.
Hizb ut-Tahrir islâm fırqası sadece Rusiyede terrorcı bir teşkilât olaraq tanındı, çünki bu teşkilâtnıñ azaları, musulmanlarğa repressiyalar sebebinden muntazam tarzda işğal akimiyetini tenqit ete ediler. Aynı zamanda Hiz ut-Tahrir dünyanıñ ülkeleriniñ çoqusında ve Ukrainada serbest şekilde faal ete.
Telegram, Viber ve Facebookta Suspilne Qırım haberlerine abune oluñız
