Rus quvetçileri, Qırımnıñ İslâm Terek rayonındaki Cuma Eli köyünde imam İsmail Yurdamovnıñ evini tinttiler. Bundan soñ onı tuttılar ve "politsiya bölügi"ne ketirdiler.
"Qırım birdemligi" bu aqqında haber berdi.
"Saba saat 5:50de evini tintmege başladılar. Bir saat içinde bitirdiler, arbiy urba kiygen adamlar onı Gazelge mindirdiler ve kasaba camisine ketirdiler. Camini de tinttiler, anda er kes bir-birine baqıştı. Bundan soñ onı başqa maşnağa mindirdiler ve İslâm Terek tarafına kettiler. Aqrabaları, şu anda onıñ qayda olğanını bilmeyler", – deo içtimaiy imayeci Mustafa Seydaliev haber berdi.
İmamnıñ qızı Gülsüm Yurdamovanıñ sözlerine köre, quvetçiler tintüv sebebini bildirmege red ettiler, bundan soñ aileniñ azalarınıñ cep telefonlarını alıp çıqardılar. Bundan ğayrı, tutulğan adamnıñ apayı, onkologiya hastalığını çeke.
"Qapını qaqtılar, politsiya dep ayttılar. Kiyinmek içün vaqıt berip kirdiler. İç bir şey añlatmayıp, er bir suale şöyle cevap berdiler: "şimdi bir adam kelip er şey añlatar". Amma iç kimse gelmedi... Maddenen bağlı sual da berdim, cevap bermediler. Şaatlarnı taqdim etmege rica ettim, iç kimse cevap bermedi, iç bir vesiqa oqumağa izin bermediler. Bundan soñ babamın alıp kettiler, "camige ketermiz, bundan soñ İslâm Terekke" dep ayttılar. Eki şaat ve adiy urba kiygen eki insan, bir vazife yapsa gerekler. Arbiy urba kiygen, silânen, yüzleri qapalı, belki beş adam edi", – dep añlattı o.
Saat 09:00da Yurdamovnı İslâm Terek rayonındaki işğal politsiyası bölügine ketirdiler.
Bundan ğayrı, İslâm Terek rayonındaki Kriniçki köyünde faalci Rustem Mustafaevniñ evini tinttiler. İçtimaiy qorçalayıcı Mustada Seydaliev bu aqqında haber berdi, dep "Qırım birdemligi" bildirdi.
Şu anda evini tintmege bitirdiler, Mustafaevni tutmadılar. İçtimaiy qorçalayıcınıñ sözlerine köre, saba saat altıda işğal politsiyasınıñ işçileri onın evine kelgenler.
"Oña evini tintüv aqqında makeme kararını kösterdiler. Onıñ evinde yasaqlanğan edebiyat, silâ, patlayıcı maddeler ve ilâhre saqlansa kerek, dep bildirdiler. Rustem Mustafaev, bu protokolnı izmalamağa red etti", — dep Seydaliev añlattı.
Birinciden politsiyacılar, Mustafaevniñ evini tinttiler, bundan soñ noutbukı ve cep telefonına baqtılar. Evini tintken soñ faalciniñ "Müiminlerniñ bağçaları" kitabını (imam An-Navaviniñ hadisler cıyıntığı — müar.) alıp çıqardılar.
Rustem Mustafaev, siyasiy sebepli davalar oturışlarını ziyaret ete, kollektiv dualarda, tevqif etilgen qırımtatarlarnı qorçalamaq içün çavuşlar adından hitaplarda iştirak ete.
Qırımdaki tintüvler aqqında ne bilemiz
Boş aynıñ 23-ünde Aluşta şeer bölgesindeki Yuqarı Şuma köyünde ve Körbekül köyünde din erbapları: "Yuqarı Cami"niñ imamı Yusuf Aşırov ve yerli din cemaatınıñ iştirakçileri Vilen Useinov ve Zinur Appazovnıñ evlerini tinttiler. Olarnı bir qaç künge tevqif ettiler.
Uquq qorçalayıcılar, din erbapları olğan Yusuf Aşırov, Vilen Useinov ve Zinur Appazovnıñ tutulmalarını rus quvetçileriniñ Aluştadaki caminiñ "Qırım musulmanları diniy idaresi"ne keçmesi isteginen bağlaylar
Telegram, Viber ve Facebookta Suspilne Qırım haberlerine abune oluñız
