İşğalciler, Aqmescitteki 2. SİZOda bulunğan qırımtatar faalcisi Amethan Umerovğa eki ekspertiza tayin ettiler. Şu anda Umerov, Aqmescitteki hastahanede mecburiy statsionar psihiartik ekspertizasında vaqtınca buluna.
Advokat Edem Semedlâyev bunı añlattı, dep Qırım birdemligi haber berdi.
"Birincisi, ses yazılarında Umerovnıñ sesiniñ olıp olmağanını belgilemek içün fonografik ekspertiza. FSB mütehassıslarına bu ekspertizanı keçirmege avale ettiler, amma biz itiraz bildirdik, çünki İİN ve FSB kibi müessiselerniñ mütehassıslarına inanmaymız. Bu eksertizanı başqa ekspert müessisesinde keçirmege istedik. Bizim muracaatımızğa cevap şimdilik daa yoq", — dep uquq imayecisi qayd etti.
Semedlâyevniñ sözlerine köre, ekinci ekspertiza, DNK testi. Şu cümleden, tintüv vaqtınca alınıp çıqarılğan kitaplarda qırımtatarlarnıñ DNK-sı olıp olmağanını belgilemek kerek.
Qorçalayıcı taraf aynı şekilde bu ekspertizanıñ İİN ve FSBniñ terkibine kirmegen başqa bir ekspert müessesende keçirilmesini soradı.
"Umumen, taqiqatçılar ve devletniñ mantığı añlaşılmaz. Qorçalayıcı tedbirni uzatuvnen bağlı makeme oturışlarında olar aytalar ki, onı keçirmek mümnkün olmay, çünki psihiatrik statsionar ekspertizasını toqtatmaq mümkün olmay. Amma aynı zamanda menim qorçalağanım adam üzerinde taqiqat işleri yapalar. Bunıñ içün Umerov daa bir kün psihiatrik hanstahenede bulunacaq, bundan soñ onı SİZOğa keri qaytarmalılar", — dep Umerovnıñ advokatı hulâsa çıqardı.
Amethan Umerov aqqında ne bilemiz
- "Qırım platforması" sammiti keçirilgen soñ arman ayınıñ 24-ünde işğal etilgen Qırımda rus quvetçileri, altı qırımtatar adamını tuttılar. O kün saba maalinde Bağçasaray şeerinde ve rayonında Remzi Nimetulayev, Ruslan Asanov, Seydamet Mustafayev, Amethan Umerov, Eldar Yakubov ve Abdulmecit Seitumerovnıñ evlerini tinttiler. Bundan soñ adamları tuttılar.
- Aynı kün Aqmescitteki işğal Kıyiv rayon makemesi, üç adamnı tuttı ve eki ayğa SİZOğa oturttı – Ruslan Asanov, Amethan Umerov ve Remzi Nimetulayev. Tutulğan adamlarğa RF CQniñ 205.5. maddesiniñ birinci qısmına mücibi – terrorcı bir teşkilâtnıñ faaliyetini teşkil etüv ve bu tür teşkilâtnıñ faaliyetinde iştirak etüv – şübe bildirdiler. RFda yasaqlanğan "Hizb ut-Tahrir" teşkilâtı aqqında laf etemiz.
- Ekim ayınıñ 20-sinde işğal makemesi, Bağçasaraydan altı qırımtatar faalcisini tevqif astında qaldırdı. 2024 senesi qara qış ayınıñ 23-üne qadar Seydamet Mustafayev, Eldar Yakubov, Abdulmecit Seitumerov, Ruslan Asanov, Amethan Umerov ve Remzi Nimetulayev SİZOda qalacaq.
Azaları işğal akimiyetiniñ musulmanlarğa qarşı repressiyaları sebebibden onı muntazam tarzda tenqit etken Hizb ut-Tahrir islâm siyasiy fırqası, Rusiyede terrorcı bir fırqa olaraq tanındı. Aynı zamanda Hizb ut-Tahrir, dünya ülkeleriniñ çoqusında, şu cümleden Ukrainada, serbestçe areket eter.
Telegram, Viber ve Facebookta Suspilne Qırım haberlerine abune oluñız
