Aqmescitteki işğal Kıyiv rayon makemesi, altı Bağçasaraylı qırımtatar faalcisini tevqif müddetini uzattı. 2024 senesi qara qış ayınıñ 23-üne qadar Seydamet Mustafaev, Eldar Yakubov, Abdulmecit Seitumerov, Ruslan Asanov, Amethan Umerov ve Remzi Nimetulayev SİZOda qalırlar.
Advokat Emil Qurbedinov, Edem Semedlâev ve Safiye Şabanova “Qırım birdemligi”ne bu aqqında haber berdiler.
“Makemede FSB yañı bir şey bildirmedi, elbette. Bizim imaye etkenimiz adamlarnıñ qaça bilmeleri, şiddetli cinayetçileri olmaları, terrorcılıq maddelerine mücibi qabaatlanmaları aqqında aynı deliller”, - dep Abdulmecit Seitumerovnıñ menfaatını imaye etken advokat Emil Qurbedinov bildirdi.
O qayd etti ki, davanıñ iştirakçilerini qaçuv telükesi sebebinden degil SİZOda tutalar. Adamlar bir-biri aqqında laf etmege red ettiler ve “terrorcı oşareti”ne itiraz bildirdiler.
Makemede imayeci red etti ki, FSBniñ bildirgenine köre Hizb ut-Tahrir terrorcılıq bir teşlikâttır. O ayttı ki, bütün qabaatlav, tasdıqlanmağan malümatqa esaslana”.
“Şikâyetnamede qayd etilgen bütün deliller - sadece taqiqatçınıñ fikirleri ve hayalleridir. Ve ukrain vatandaşlığı, cinayet degil ve qorçalayıcı tedbirniñ müddetini uzaquv sebebi olmaz”, - dep advokat Edem Semedlâev qoştı.
Hatırlatamız ki, orman ayınıñ 24-ünde saba saat dörtte rus quvetçileri, altı qırımtatar adamı - Seydamet Mustafaev, Eldar Yakubov, Adbulmecit Seitumerov, Ruslan Asanov ve Remzi Nimetulaevniñ evlerine kirip, tinttiler.
Beş adam, çtimaiy faalciler ve çoq balalı babalardır. Seitumerovnıñ keçkende daa bir balası doğdı. Abdulmecit, Bağçasaraylı siasiy mabüsler olğan, 2020 senesi saban ayında tevqif etilgen, 17 ve 14 senege maküm etilgen Osman ve Seitumer Seitumerovnıñ doğmuş qarsaşıdır.
Tevqif etilgen qırımtatarlarnı destek etici numayışlarda bütün altı Bağçasaraylı faalci çoq kere tutuldı.
Telegram, Viber ve Facebookta Suspilene Qırım haberlerine abune oluñız
