Soñ afta vaqtınca işğal etilgen topraqlarda "Sarı şerit" içtimaiy qarşılıq areketine Qırımdan 50 yañı faalci qatıldı.
Öz Telegram kanalında "Sarı şerit" bu aqqında haber berdi.
"Aqmescit, Aqyar, Yalta, Keriç, Kezlev, Hafuz – Ukrainadır! Qırımnıñ vaqtınca işğal etilgen şeerlerinde "Sarı şerit" areketiniñ faalcileri, rus işğaline qarşılıq köstermege devam eteler", - dep bildirildi.
Bundan ğayrı, bir afta devamında qırım faalcileri, Qırımnıñ işğaline qarşılıq bildirmek maqsadınen eñ az 200 kâğıtlarnı asıp qoydılar ve 250 sarı şeritni bağladılar.
Qırımda "Sarı şerit"niñ soñ numayışları aqqında ne bilemiz
- Arman ayınıñ 24-ünde Ukraina Mustaqillik künü "Sarı şerit" areketi, "Aqmescit —Ukrainadır" eñ miqyaslı online mitingini ilân etti.
- Arman ayınıñ 23-üne Ukraina Devlet bayrağı kününe işğal etilgen Qırımdaki Şaan Qayada mezkür areketniñ faalcileri, ukrain bayrağını köterdiler.
- Bundan ğayrı, "Sarı şerit" areketi, "Oçi" yañı çat botunı yarattı. Anda rus tecavuzcılarınıñ Ukrainanıñ vaqtınca işğal etilgen topraqlarındaki cenk cinayetleri aqqında malümat yollamaq mümkün.
- "Sarı şerit" qarşılıq areketi, "Rus şeyleri yansıñlar" adlı yañı müddetsiz aktsiyasını başlattı. Faalciler, Ukrainanıñ vaqtınca işğal etilgen topraqlarında rus timsallerini ateşke taşlamağa ve alıp çıqarmağa çağıralar.
- Bozarsan ayda Qırımda "Sarın şerit" faalcileriniñ sayısı 3 500ge yetti.
- Bu areketniñ qırım yönelişi idarecisi bildirdi ki, işğalcilerniñ isteklerine baqmadan faalciler toqtamaycaqlar. Aksine de, er kün qarşılıq areketi daa quvetli olacaq.
- Bundan ğayrı, "Sarı şerit" faalcileri, Avrupa parlamentiniñ mebuslarına Qırım işğalden azat etilecek soñ Kıyiv -Aqmescit trenine biletlerni ediye ettiler ve yarımadada qarşılıq köstergen ve qarşılıq areketini destek etken insanlardan mektüplerni berdiler.
Telegram, Viber ve Facebookta Suspilne Qırım haberlerine abune oluñız
