RF Mudafaa nazirligi bildirdi ki, berim ayınıñ 13-ünde gece maalinde qanatlı raketa ücümi neticesinde Aqyar deñiz zavodında tamir etilgen eki gemi bozuldı. Yanğın sebebinden eñ az 24 insan yaralandı.
Telegramda RF Mudafaa nazirliginiñ matbuat hızmeti bu aqqında haber berdi.
"Bugün gece USQ, on qanatlı raketanen Aqyar şeerindeki S. Orconikindze adına gemi tamir zavodına ve üç taqımsız katernen deñizdeki Qara deñiz flotunıñ gemilerine ateş açtılar", - dep bildirildi.
Aynı zamanda müessise bildirdi ki, sanki rus aava mudafaası vastaları, yedi qanatlı raketa tüşürdiler, "Vasiliy Bıkov" patrul gemisi bütün taqımsız katerlerni mahv etti.
Bundan ğayrı yanğın yerine Aqyarnıñ işğal gubernatorı Mıhaylo Razvojayev keldi. Öz Telegram kanalında yazdı ki, şeerdeki içtimaiy obeyktler içün telüke yoq.
"Ücüm neticesinde ilk malümatqa köre, umumen 24 insan yaralanğan, 4-üniñ alı orta seviyelidir. Yaralanğanlarğa bütün kerekli yardım tolu miqdarda berile", - dep Razvojayev qayd etti.
İlk malümatqa köre, bozulğan gemilerden biri - işğalcilerniñ "Ropuha" türü desant gemisidir (775. leyha).
Bundan ğayrı, berim ayınıñ 8-inde şaatlar, "Qırım yeli" Telegram kanalına haber berdiler ki, Aqyar deñiz zavodınıñ yalısı yanında Aqyarnıñ Cenübiy körfezinde 21631. leyhanıñ "Buyan-M" kiçik raketa gemisi tura edi. O, "Kalibr" kanatlı raketalarınıñ taşıyıcısıdır.
Berim ayınıñ 13-ünde saba maalinde Aqyardaki gemi tamir zavodına kiriş yolu qırşavlanğan. Anda mahsus hızmetler çalışalar, dep Telegramda RIA "Novosti Qırım" propaganda malümat agentligi haber berdi.
Aqyar deñiz zavodı aqqında ne bilemiz
- "Serio Orconikidze adına Aqyar deñiz zavodı" FGUP - umumen 53 gektarlıq eki iştigal meydançığındaki şeerniñ gemi tarafında bulunğan gemi tamir müessisesidir. Zavod, Qara deñiz flotunıñ gemilerini tamir etmek içün esas meydançıqtır.
- Suv tübündeki gemilerni baqmaq ve olarnı tamir etmek içün Aqyar deñiz zavodında Qara deñiz flotunıñ mahsus leyha tehnik bürosı teşkil etildi.
- 2015b senesi işğal akimiyeti zavodnı Aqyarnıñ menfaatına milliyleştirdi, amma endi 2019 senesi o, RF sanayı ve ticaret nazirliginiñ idaresine federal mülkiyetke keçti.
- 2017 senesi rus askerleri ve mahsus hızmetlerinen bağlanğanı içün AQŞ zavodnı sanktsiyalar astına qoydı, 2021 senesi ise Ukrainanıñ sanktsiyaları astında da oldı.
- 2022 senesi berim ayında ruhiyenin Ukrainağa tolu miqyaslı tecavuzı sebebinden Aqyar deñiz zavodı, AQŞnıñ keñiş sanktsiya cedveline kirsetildi.
Telegram, Viber ve Facebookta Suspilne Qırım haberlerine abune oluñız
