Rusiye makemesi tarafından 17 senege maküm etilgen ve bir qaç qalp krizini yaşağan Qarasuvbazarlı faalci, 59 yaşındaki qırımtatar Azamat Eyüpovnı Çelâbinsk vilâyetine etap ettiler.
Apayı Gülnara Eyüpova, "Qırım birdemligine" bunı añlattı.
Eyüpovanıñ sözlerine köre, berim ayınıñ 1-inde siyasiy mabüs epishane bağlantısınen telefon etken ve qayd etken ki, yaşağan hastalıqlardan soñ sağ ayağı tamamınen areket etemez.
"Yolda kameradaşları oña çatnalarınen yardımcı oldılar. Azamat ketkeni noqtağa kelgen soñ onı mahsus blokka karantinğa oturttılar. Anda tek afta buluna edi, sağlığı sebebinden daa çoq tutmadılar", - dep aqayınıñ sözlerini añlata o.
SİZOda dört koronar qap krizini yaşadı. Tibbiy yardım almağanından sebep Azamat Eyüpov yardımsız areket etemez.
Azamat Eyüpov aqqında ne bilemiz
- 2021 senesi kiçik aynıñ 17-sinde Qarasuvbazarda kütleviy tintüvler vaqtında qırımtatar adamı tutuldı.
- Oña RF CQniñ 205.5. maddesiniñ birinci qısmını (terrorcılıq faaliyetini teşkil etüv) berdiler ve RFda yasa etilgen, amma dünyanıñ çoq ülkesinde, şu cümleden Ukrainada, serbest şekilde areket etken "Hizb ut-Tahrir" islâm siyasiy fırqasına ait olmaqta qabaatlaylar.
- 2022 senesi oraq ayında Rostov-na-Donudaki Cenübiy bölge arbiy makemesi, Eyüpovnıñ ağır sağlık alını esapqa almadı ve 17 senege maküm etti. Siyasiy mabüs, birinci üç sene epishanede geçirmeli. Apellâtsiya makemesi, bu qararnı tanıdı.
- Qırımtatar adamını tibbiy baqmaları içün advokatı Emil Kurbedinov, taiqat izolâtorına hitap etti. Feldşer, osteohondroz diagnozı berdi ve asğariy tedaviylevnen kameraya qaytardı.
- 2023 senesi oraq ayında aqrabalarınıñ parasınen şahsiy ekimler Eyüpovnı baqtılar, onıñ qorçalayıcısı buna irişmege ıntıla edi. Mustaqil ekimler qayd ettiler ki, SİZOda maznun dört koronar qap krizini yaşadı ve acelen hastahanege yatmalı.
Telegram, Viber ve Facebookta Suspilne Qırım haberlerine abune oluñız
