Qırım işğal Yuqarı makemesi, arman ayınıñ 24-ünde tintüvlerden soñ tutulğan Bağçasaraylı altı qırımtatar faalcisini ekim ayınıñ 23-üne qadar tevqif astında qaldırdı.
"Qırım birdemligi"ne tefsir etkende tutulğanlarnıñ advokatları bunı añlattılar. Olar tüşüneler ki, qırımtatarlarnı terrorcılıq faaliyetinde sebepsiz qabaatlaylar.
Seydamet Musatafyev, Eldar Yakubov, Abdulmecit Seitumerov, Ruslan Asanov, Amethan Umerov ve Remzi Nimetulayev aqqında laf oldı.
Seydamet Mustafayevnıñ advokatı Safiye Şabanova, şikâyetnamesinde "makeme"niñ tevqifke dair qararı aqqında qayd etti ki, adamnı ev tevqifi astında olmalı. Sebepleri arasında: onıñ dört balası bar, eñ kiçiginiñ eki ayı bar. Adam, apayına balalarnı baqmağa yardım etmeli.
Bundan ğayeı, makeme Mustafayevniñ delillerni tanımadı. Delilleri, qanunsız faaliyetni yapmağanı, er vaqıt "adiy" ayat yaşağanı ve çatışmalarda iştirak etmegenini tasdıqlaycaq ediler.
Ruslan Asanovnıñ qorçalayıcısı Refat Yunus qayd ete edi ki, taqiqatnıñ adamnı taqiqat izolâtorına yollaması içün yeterli delilleri yoq. Asanov özüni yahşı duya, amma mektüplerni alâ daa alamay.
Amethan Umerovnıñ advokatı Edem Semedlâyev añlattı ki, "makeme", qırımtatar adamına başqa qorçalayıcı tedbir saylamaq içün iç bir delil tanımadı. Umerov özüni yahşı duya ve destek etmesi içün cemaatqa teşekkür bildire.
Abdulmecit Seitumerovnıñ qorçalayıcısı Emil Kurbedinov qayd etti ki, FSB aqiqiy olmağan bilgilerni berdi. Bundan ğayrı, tevqif etilgen bütün altı adamğa Jenevre şartnamesiniñ dörtünci maddesi işley: işğal etilgen topraqlarnıñ bütün sakinlerine qorçalav kefil olunır. Amma birinci seviyeli "makeme" ve "Yuqarı makeme", maqbul delillerni "inandırıcı olmağan" dep ayttılar.
Arman ayınıñ 24-ünde altı qırımtatar adamınıñ tutulmaları aqqında ne bilemiz
- 2023 senesi arman ayınıñ 24-ünde Qırımnıñ Bağçasaray rayonında yaşağan qırımtatarlarnıñ evleri kütleviy tarzda tintildi. Bundan soñ altı vatandaşı tutıldı ve tevqif etildi: Seydamet Musatafyev, Eldar Yakubov, Abdulmecit Seitumerov, Ruslan Asanov, Amethan Umerov ve Remzi Nimetulayev.
- Olarnı, "Hizb ut-Tahrir" haqlara siyasiy islâm teşkilâtına sanki ait olmakta qabaatlaylar.
- Beş adam - içtimaiy faalciler ve çoq balalı babalarıdır, eki ay evel Seitumerovnıñ balası doğdı. Abdulmecit Seitumerov - 2020 senesi tevqif etilgen ve 17 ve 14 senege maküm etilgen Bağçasaraylı eki siyasiy mabüs Osman ve Seitumer Seitumerovnıñ doğmuş qardaşıdır.
- Başqa tutulğan qırımtatarlarnı destek numayışlarında bütün altı Bağçasaraylı faalci endi tutula edi. Nimetulayev ve Mustafayevni bir qaç künge tevqif oluna ediler.
- İşğalciler, "vatandaşlarnıñ kütleviy bulunmalarınen içtimaiy nizamnı bozğanı içün" Yakubovğa 10 biñ rublelik para cezasını berdiler. Umerov ise mahsus tutun müessisesinde bir qaç kün keçirdi ve "FV ya da telükesi vaqtında qaidelerni riayet etmeme aqqında" aynı maddege mücibi para cezasını ödedi.
Telegram, Viber ve Facebookta Suspilne Qırım haberlerine abune oluñız
