Rusiyede Noman Çelebicihan adına batalyon davasında qanunsız şekilde tutulğan siyasiy mabüs Ruslan Abdurahmanovnı bir kişilik kameraga köçürdiler. Anda o apis müddetiniñ soñuna — 2027 senesi çeçek ayınıñ 20-sine — qadar bulunacaq. Dört buçuq seneden ziyade esirlik devamında adamnıñ sağlıq alı ciddiy derecede beterleştdi.
Qırımtatar Resurs Merkeziniñ idarecisi Zarema Bariyeva bunı bildirdi.
Onıñ sözlerine köre, Abdurahmanov 35 yaşında ola, amma eski ve müstemlekede peyda olğan hastalıqlar sebebinden o, özüni çoq daa qart is ete. Siyasiy mabüsniñ apayı añlata edi ki, onıñ sağlıq alı, hususan apiste kerekli tedaviy olmağanı sebebinden, beterleşe.
Apis devamında adamnı bir qaç kere uzun müddetke kartserge ve quvetleştirilgen rejimli baraqqa (BUR) yerleştirdiler. Şimdi tutuv rejiminiñ küçlendirilgeni sebebinden onı bir kişilik kameraga köçürdiler.
Bariyevanıñ sözlerine köre, Abdurahmanovnıñ küçlü qaşıntınen psoriazı ve ağır nevrologik patologiyası bar. Qan damarları sıqılğanı ve baş beyine oksigen yetmegeni sebebinden onıñ sol tarafı daimiy şekilde üyüşe.
Müstemlekeniñ tibbiy qısmında siyasiy mabüske bir qaç ilâç yazdırdılar, amma QRMniñ idarecisi sözlerine köre, olarnıñ adlarını ve ne içün olğanını oña bildirmeyler. Bunıñ sebebinden adam belli olmağan ilâçlarnı qullanmaqtan qorqa.
Tutulmazdan evel Ruslan Abdurahmanovğa boyun qısmındaki üç quyuldıqnı çıqarmaq içün acele ameliyat kerek edi. Em de onıñ nevralgiyası bar edi, bu, damarlarnen meselelerniñ sebebi edi. Amma müstemlekede oña kerekli cerrahiy ameliyat yaptırılmadı, dep bildirdi Qırımtatar Resurs Merkezi.
Abdurahmanovnıñ qorantası apis devamında bir körüşüv de almadı. Apayınen o, sadece mektüpler vastasınen alâqa qura bile, olar, Bariyevanıñ sözlerine köre, pek keç yetişe. Adamnıñ eki kiçkene qızı babalarını fotoresimlerden ve anasınıñ añlatqanlarından bile.
Ruslan Abdurahmanov aqqında ne bilemiz
- 2022 senesi çiçek ayınıñ 18-inde Herson vilâyetindeki Geniçesk rayonınıñ Azovskoye köyündeki Abdurahmanovnıń evine «DNR» işaretlerine, silâ ve Rusiye bayraqlarınen, balaklavarnı taqqan insanlar izinsiz kirdiler. Onı urdılar, tuttar ve azaplar qullanaraq işğal etilgen Geniçeskteki 17. PTUda soradılar.
- Qırımtatar adamını işğal etilgen Aqmescitteki FSB binasına zornen ketirdiler, anda da oña basım etere, soradılar. Muntazam tesir, qorqutuvlar ve ailesi içün raatsızlıqlar sebebinden adam, sahte malümat berdi, birazdan öz mektebinde bu azaplarnı añlattı.
- 2022 senesi arman ayınıñ 9-ında Aqyardaki işğal Kıyiv rayon makemes, Abdurahmanovnı 5 senege maküm etti, FSBniñ tesiri sebebinden qorçalayıcı taraf, şikâyet arizasını yollamadı.
Hatırlatamız ki, Qırımtatar Resurs Merkeziniñ malümatına köre, işğalciler Noman Çelebicihan adına batalyonda iştirak etkeni içün 70 Ukrayina vatandaşını apiske aldılar: 21-ini — işğal etilgen Qırımda, 49-ını — 2022 senesi kiçik aynıñ 24-nden soñ işğal etilgen Herson vilâyetinde.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
