Qırımdan 19 jurnalist, vatandaş jurnalisti ve bloger qanunsız şekilde apiste ya da tutuv altında qala. Olarnıñ çoqusı — qırımtatarlar.
Ukrayina Yuqarı Şurasınıñ Rusiye Federatsiyası silâlı teşkilâtları tarafından jurnalistlerge ve diger media hadimlerine qarşı yapılğan cinayetlerni taqiqat etüv boyunca muvaqqat taqiqat eyyetiniñ 16-ncı oturışında Ukrayina Prezidentiniñ Qırımdaki Daimiy Temsilcisiniñ muavini Denıs Çıstikov bunı bildirdi.
«Denıs Çıstikov ictimaiy cemiyetke basqınıñ yañı mehanizmlerine ayrı diqqat ayırdı. Hususan, Rusiye akimiyeti «çetel agentler» sözde cedveline kirsetken qırımtatar jurnalisti ve uquq qorçalayıcı Lütfiye Zudiyevanıñ taqipi, jurnalist Lenora Dülberniñ yaşağan yerinde tintüvler, em de «Qırım birdemligi» iştirakçilerine ve uquq qorçalayıcı teşkilâtlarğa qarşı basqı tedbirleriniñ küçlendirilmesi aqqında söz ketti», — dep qayd etile haberde.
Hatırlatamız ki, evel Qırımtatar Resurs Merkezi 20 apiste olğan jurnalist aqqında bildirgen edi, 2026 senesi orta küz ayı alına köre ükümler 29 insanğa çıqarıldı.
QRMniñ «Aqiqat fiyatı: Rusiye işğal etilgen Qırımda jurnalistlerni nasıl taqip ete?» esabatında bu bilgi qayd etile, onı orta küz ayınıñ 20-nde taqdim ettiler.
QRMniñ reisi Eskender Bariyev bildirdi ki, Qırım işğal etilgen soñ bir qaç mustaqil ukrayin ve qırımtatar mediası faaliyetini toqtatmağa ya da yarımadadan çıqmağa mecbur qaldılar. Şu cümleden, bular ATR, «Qara deñiz TRK», «Qırım odası», «Avdet», Jurnalist taqiqatları merkezi ve QHA.
Onıñ sözlerine köre, onlarca jurnalist işğalli akimiyet taqibi sebebinden Qırımnı terk ettiler. Şu cümleden, Jurnalist taqiqatları merkeziniñ jurnalistkaları Valentına Samar ve Anna Andriyevska, «Qara deñiz TRK» jurnalisti Oleksandr Yankovskıy, «Radio Svoboda»nıñ mahsus muhbiri Volodımır Prıtula ve evinde tintüvden soñ çıqqan bloger Yelızaveta Boğutska.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
