Orta küz ayınıñ 29-nda işğal etilgen Qırımda magistral ağlardan yeterli elektrik energiyası kelmegeni içün o sıñırlana. İşğal etilgen Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeerinde 175 telefon şarj etüv noqtası açıldı ve marşrutlarda trolleybuslarnıñ sayısı qısqartıldı, Keriç ve Aluşta şeerlerinde ve Bağçasaray rayonınıñ qısmında suv teminatınen bağlı meseleler beklenile.
Orta küz ayınıñ 29-nda işğalli «Krımenergo»nıñ saytında elektrikni söndürüv cedveline riayet etemezligi aqqında haber berildi.
«Qırım Cumhuriyetine magistral ağlar vastasınen berilgen elektrik energiyasınıñ yetersiz miqdarı yarımadanıñ ştat elektrik teminatını qullanmağa imkân bermey. Qırım Cumhuriyetiniñ bütün toprağında elektrik energiyasınıñ qullanuvı sıñırlana. Bu mecburiy, elektrik ağlarınıñ aşırı yüklenmesini yoq etmek içün, elektrik ağında qazalar olmamaq içün kerek olğan bir tedbirdir. Şimdi elektrik kesilüvi cedvellerine riayet etüv ve mevcut taqatnıñ musaviy bölüvi imkânsızdır. Elektrik energiyası elektrik ağınıñ imkânlarına köre berile. Birinciden, içtiamiy ceetten müim olğan obyetler içün elektrik teminatınıñ yedek shemaları qullanıla», — dep qayd etildi haberde.
Sevastopol (Aqyar) şeerinde işğalciler telefon şarj etüv noqtalarını açalar. Şeerniñ işğalli gubernatorı Razvojayev bildirdi ki, endi 175 böyle noqta çalışa. Bundan ğayrı, şeerde trolleybuslarnıñ tek bir qısmı uzatılğan aranen çalışa.
Bundan ğayrı, bugün, orta küz ayınıñ 29-nda, Keriç ve Aluşta şeerlerinde, em de Bağçasaray rayonınıñ qısmında suv teminatı toqtatılacaq.
Hatırlatamız ki, orta küz ayınıñ 24-nde gece işğal etilgen Qırımda vaqtınca elektrik söndürildi. İşğalli akimiyet yarımadanıñ tışındaki elektrik ağlarında qaza olğanını bildirdi. Rusiye Federatsiyasınıñ Krasnodar ülkesinde 500/220 kV «Taman» elektrik ast stantsiyasında yanğın oldı. Bundan da ğayrı, saba maalinde yarımadadan internet areketi aman-aman yoq, yarımadanıñ bir qısmı alâ daa elektriksiz qala.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
