1918 senesi orta küz ayınıñ 14-nde Simferopolda (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adte) Tavriya universitetiniñ – Qırım yarımadasındaki ilk ilk lâdiniy universitetniñ – tantanalı açılışı olıp keçti.
Onıñ meydanğa ketirilmesi Qırımnıñ intellektual inkişafınıñ yañı basamağını başlap, tasil ve ilim tarihında müim bir vaqia oldı, dep yazdı Ukrayina Prezidentiniñ Qırımdaki Temsilciligi.
«Universitetniñ tarihı meşur alim ve maarifçilerniñ adlarınen bağlı. Olarnıñ arasında — birinci rektorı, professor Roman Ğelviğ ve 1920 senesi Tavriya universitetine yolbaşçılıq etken Ukrayina ilimler akademiyasınıñ birinci prezidenti Volodımır Vernadskıy», — dep qayd etildi Temsilcilikniñ haberinde.
1999 senesi universitet Milliy statusını aldı ve Vernadskıy adını aldı. Qırımnıñ Rusiye işğaline qadar universitette tahminen 15 biñ student oqudı, 900-den ziyade oca çalıştı.
Qırım işğal etilgen soñ universitet Kıyivde yerleşti ve 2016 senesi işini yañıdan başlattı.
«Mecburen köçkenine baqmadan, universitet öz tasil ananelerini, ilmiy mirasını ve tuvğan Qırımı ile bağını saqlap qaldı. Tarihı Aziz Volodımır adına Kıyiv universitetiniñ bölüginden başlağan universitetniñ aman-aman bir asırdan soñ öz işini Ukryainanıñ paytahtında yañıdan başlağanı timsaliy bir şeydir», — dep qayd ete Temsilcilik.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
