Gaagadaki arbitraj mahkemesi, işğal etilgen Qırımda bank aktivleriniñ qanunsız ekspropriatsiyası sebebinden Rusiyege «PrıvatBank»qa 327 million dollar tazminat ödemege mecbur etti.
Orta küz ayınıñ 6-nda bank matbuat hızmeti bu aqqında haber etti.
Bu qarar 2015 senesi Ukrayina-Rusiye yatırımlarnı qorçalav añlaşması esasında başlanğan arbitraj esnasında Halqara mahkemeniñ Daimiy palatası tarafından qabul etildi. Arbitraj, Rusiyeniñ yatırımlarnı qoruv mecburiyetlerini bozğanını tanıdı ve bank aktivleriniñ qanuniyligi ile bağlı itirazını red etti.
2014 senesi çeçek ayınıñ 18-den başlap berilgen tazminat miqdarına fayizler kirsetilecek, olar tam olaraq ödenilgenine qadar artacaq, em de bank masrafları tazmin etilecek.
«PrıvatBank» reorganizatsiyası ve problemli aktivler meseleleri boyunca idare şurasınıñ azası Solvita Deglava qararnı 11 yıllıq mahkeme küreşinden soñ müim ğalebe dep adladı ve onıñ tolusınen yerine ketirilmesini talap etecegini bildirdi.
Qırımdaki «PrıvatBank» aktivleriniñ qanunsız ekspropriatsiyası davası aqqında ne bilemiz
Qırım işğal etilemden evel yarımadada banknıñ büyük aktivleri bar edi. Hususan, mülkiyet, kredit portfeli ve Rusiye akimiyetiniñ bölgeni zapt etken soñ yapqan areketleri neticesinde ğayıp etilgen paralar.
2015 senesi «PrıvatBank» Rusiyege qarşı arbitraj davasını başlattı. Arbitraj mahkemesi Qırım işğali vaqtında «PrıvatBank»nıñ aktivlerini zapt etüv qanunsız olğanını tanıdı.
2019 senesi Rusiye Gaagadaki Apellâtsiya mahkemesine muracaat etip, arbitraj qararını yoq etmege ya da lâğu etmege talap etti.
2022 senesi İstinaf mahkemesi şikâyetni bütünley red etti, amma Rusiye Yuqarı mahkemege şikâyet etti.
2024 senesi Felemenk Yuqarı mahkemesi, Rusiyeniñ Qırımdaki «PrıvatBank» aktivlerini qanunsız zapt etkenini tanığan arbitraj qararlarını tasdıqladı. Bu, Rusiye Federatsiyasınıñ keçmiş mahkeme qararlarına itirazları red etilgeni sebebinden, bankqa ketirilgen zararnıñ miqdarını belgilemege yol aça.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
