Aqmescitte, işğal etilgen «Qırım Devlet şurası» binası yanında işğalciler, talebeleri Rusiye Ukrayinağa qarşı cenkte iştirak etken ya da cenkte elâk olğan pedagoglar aqqında «Ğeroy oca» foto sergisini açtılar. Teşkilâtçılarnıñ fikirince, bu ocalar kelecekte «qoruyıcılarnı» terbiyelep, olarda «sertlik, namus ve Vatanğa sevgi»ni şekillendirecekler. İşğalci akimiyet işğal altındaki Qırım sakinleriniñ Rusiyege qarşı cenkte iştirak etkenini populârlaştırmağa tırışa.
Qırımnıñ işğalci matbuat vastası «Qırım 24» bu aqqında yaza.
İşğalciler yarımadanıñ bütün qısmından talebeleri Ukrayinağa qarşı cenkleşken ya da cenkte elâk olğan yigirmi ocalarnıñ fotosüretlerini yerleştirdiler. Vesiqalarda Rusiye arbiyleriniñ propaganda terbiyesine qoşuluvı qayd etile.
'Bu sergi, eñ evelâ, insanlarnıñ vatanperverlik duyğusını doğurmalı. Bu resimlerge baqıp, bu ikâyelerni oquğanda, qırımlılar sergilerimizni sevgenini ve olarnen tanış olmaqtan memnün olğanını bilem', — Qırımnıñ içki siyaset, malümat ve alâqa naziriniñ muavini Yuliya Kılık dedi.
Hatırlatamız, Qırım MC ve Aqyar prokuraturasınıñ malümatına köre, 2014 senesinden başlap işğalciler yarımadada 20-den ziyade askerlikke aluv kampaniyasını keçirdi, neticede tahminen 55 biñ adam Rusiye ordusına zorbalıqnen qoşuldı. Olarnıñ arasında Ukrayina vatandaşları bar.
Qırımda Rusiye ordusına mobilizatsiyanıñ yañı dalğası qayd etile, dep Qırımtatar resurs merkeziniñ idare reisi bildirdi, Qırımtatar halqı Meclisiniñ azası Eskender Bariyev. Onıñ aytqanına köre, işğal etilgen Qırımnıñ şimaliy qısmında sakinlerge Rusiye ordusına askerlikke celp etmek içün vesiqalarnı berüv teşebbüsiniñ onnen ziyade adisesi qayd etildi. Bazı insanlar, olarnıñ arasında qırımtatarlar bar, yarımada ve Rusiyeden çıqmağa tırışalar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
