63 yaşındaki Ğalına Perelovıç, Qırımnıñ sabıq köy yolbaşçısı, 15 yılğa apis cezasına mahküm etildi. İvano-Frankivsk şeer mahkemesinde üküm çıqarıldı. 2025 senesi işğalciler onı Herson vilâyetindeki Kalançak köyüniñ vaqtınca «memuriyet yolbaşçısı» olaraq tayinlediler.
Mahkeme saytında bu aqqında aytıla.
Perelovıç Ğalına Yanoşivna Ukrayina Ceza kodeksiniñ 111-1 maddesiniñ 5-inci qısmı, 111-2 maddesiniñ 1-inci qısmında qayd etilgen cinayet işlegeninde qabaatlı tanıldı ve 15 yıl müddetine devlet akimiyeti ve yerli idare organlarında vazifeler tutmaq aqqından marum etilip, bütün mal-mülkiniñ musadere etilmesi ile 15 yılğa azatlıqtan marum etilüv cezasını aldı. Mahkeme, Perelovıç Ğalına Yanoşivnanıñ apis cezasını bu ükümge köre çekmek içün apis etilgeninden saymaq kerek, — dep bildirdi.
Tahqiqat malümatına köre, Perelovıç de Rusiye ordusına yardım ete.
O, Donetsk yönelişinde Ukrayinağa qarşı cenk areketlerinde iştirak etken Rusiye Federatsiyası Silâlı quvetleriniñ Kutuzov ve Aleksandr Nevskogo ordenli 98-inci gvardiya Svirska Qırmızı Bayraqlı ava-desant bölüginden işğalcilerge bağ vastaları ve kompyuter tehnikasınen yardım ete. Bundan da ğayrı, o, vaqtınca işğal etilgen ukrayin topraqlarında duşman rejimini qanuniyleştirmek içün işğalci akimiyet faydasına bozucı informatsion faaliyetnen oğraşa, — dep mahkeme qararında aytıla.
Mahkeme eki şaatnı diñledi. Olardan biri 2025 senesi boş ayına qadar vaqtınca işğal etilgen Kalançakta qaldı ve Pereloviçniñ yerli «memur» vazifesine tayin etilmesini red etti.
Qırımnıñ Aromatne köyünde yaşağan daa bir şaat, Perelovıçnı yahşı tanığanını ayttı.
Perelovıç Qırımdaki Aromatne köyünden kele. 2006 senesinden berli eki kere tuvğan köyüniñ yolbaşçısı olaraq saylandı. Bundan evel köy şurasınıñ deputatı ve kâtibi edi.
Jurnalistlerniñ taqiqat merkeziniñ malümatına köre, 2014 senesi Qırım işğalinden soñ Ğalına Perelovıç işğalci akimiyet içün çalışmağa başladı. Başta Aromatne köyüniñ gaulaytçısı edi, 2014 senesi ilk qış ayınıñ soñunda ise Qırım MC Bilogır rayonınıñ gaulaytçısı vazifesine tayinlendi. 2022 senesiniñ soñunda Qırımnıñ işğalci yolbaşçısı Sergey Aksönov, Pereloviç öz isteginen işten boşatılmasına dair ariza yazdı, dep bildirdi. Daa soñ Herson vilâyetinde qaldı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
