58 yaşındaki Qırım siyasiy mabüsi Lenur Halilov, metastazlanğan qara ciger kanseri, hepatit C, gipertoniya ve diger hastalıqlarnı çekip, Rusiye esirliginde kritik alda buluna. Erkek ağır sağlıq vaziyetine baqmadan, Arhangelsk vilâyetindeki apishaneniñ hastahanesinde tutula.
APUS uquq qorçalayıcı teşebbüsi bunı bildirdi.
«Aluşta» mustaqil musulman cemiyetiniñ sabıq yolbaşçısı qanunsız şekilde 18 yılğa üküm etildi. Şimdi Halilov Rusiye Federatsiyasınıñ Arhangel vilâyetinde apishaneniñ statsionarında buluna.
Uquq qorçalayıcılarnıñ malümatına köre, qırımtatar öz başına areket etip olamay ve daima ciddiy ağrılar çeke. Bu sebepten oña Tramadol degen opioid ağrı kesicisini tayin ettiler.
İlk küz ayınıñ 15-nde Halilovnıñ advokatı onı apishane statsionarından mahsus tibbiy müessisege avuştırmaq ricasınen ariza berdi. Uquq qorçalayıcılarnıñ aytqanlarına köre, bu, siyasiy mabüsniñ eñ az tuvğanları ve yaqınları ile körüşmesine imkân berecek.
Daa evel Rusiye akimiyeti Halilovnıñ ağır hastalığına baqmadan, onı apisten çıqarmadı.
Lenur Halilov aqqında ne bilemiz
Lenur Halilov — "Aluşta" mustaqil musulman cemiyetiniñ sabıq reisi.
2019 senesi ilk yaz ayınıñ 10-nda Qırımda dört qırımtatar musulmanınıñ evinde OMON, mahsus hızmetleri ve Aşırıcılıqnen küreş merkeziniñ hadimleri tarafından kütleviy tintüvler keçirildi. Aluştada quvetçiler imam vazifelerini eda etken Ruslan Nagayevni ve iş adamı Eldar Kantımırovnı, Malıy Mayak (Büyük Lambat) köyünde — Ruslan Mesutovnı, İzobilne (Körbekül) köyünde ise — Lenur Halilovnı tuttılar.
Em Mesutov, em de Halilov yerli din cemiyetleriniñ yolbaşçıları ediler. Apiske alınmazdan evel olar cemaat faaliyetinen oğraşa ediler: musulman bayramlarını teşkil ete, cenazelerge yardım ete, vesiqalarnı resmiyleştire, namaz keçire ediler.
2021 senesi arman ayınıñ 16-nda Cenübiy bölgeniñ arbiy mahkemesi Hizb ut-Tahrir davasınıñ "Aluşta gruppası"nıñ mebüslerine üküm çıqardı. Nagayev ve Kantımırov 13 ve 12 yılğa, Halilov ve Mesutov 18 yılğa üküm etildi. Soñkileri "terroristik gruppası"nıñ teşkilâtçıları, Nagayev ve Kantımırov ise onıñ iştirakçileri olaraq tanıldı.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, «qanunlarğa qarşı faaliyet»te ve böyle degen «cian hilâfeti»ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
